माया योसिदा (जापान)
समूह ‘एच’ को पहिलो खेलमा जापानले कोलम्बियालाई २-१ ले हराउँदा रक्षापंक्तिको योसिदा अडिग देखिए । विपक्षी खेलाडीलाई आफ्नो क्षेत्रमा रोक्नमात्रै हैन, आफ्नो क्षेत्रबाट बल अघि बढाउँदै गोलका लागि स्ट्राइकरलाई अवसर सिर्जना गर्न र आफैं गोल गर्नसमेत उनी सक्षम छन् । तुलनात्मक रूपमा बलियो देखिएको बेल्जियमलाई रोक्न पनि प्रशिक्षक अकिरा निसिनोको पहिलो रोजाइमा यिनै २९ वर्षीय योसिदा परेका छन् ।
सन् २०१२ को लन्डन ओलम्पिकमा जापानको राष्ट्रिय टोलीको कप्तानी गरेका योसिदाले टोलीलाई रुस विश्वकपमा छनोट गराउन पनि महत्वपूर्ण योगदान पुर्याएका थिए । इङ्लिस क्लब साउथह्याम्पटनबाट व्यावसायिक फुटबल खेलिरहेका योसिदाको क्लब फुटबलमा पनि उत्कृष्ट प्रदर्शन गर्दैै आएका छन् । विशेषगरी जापानले रुस विश्वकपमा रक्षात्मक रणनीति तय गरिरहेको अवस्थामा टोलीलाई पराजयबाट जोगाउन र जिततर्फ अग्रसर गराउन उनकै भूमिका मुख्य र निर्णायक हुने पक्का छ ।
सन् २००८ देखि जापानको यू-२३ टोलीबाट खेल्दै आएका उनी सन् २०१० देखि सिनियर राष्ट्रिय टोलीको मुख्य खेलाडी हुन् । उनले जापानका लागि खेलेका ८३ खेलमा १० गोलसमेत गरिसकेका छन् । जस्तोसुकै चतुर स्ट्राइकरलाई रोक्ने क्षमता भएका यासिदालाई छल्न बेल्जियमलाई कठिन हुनेछ अनुमान गर्न सकिन्छ ।
हिर्भिङ लोजानो (मेक्सिको)
विश्वकपको सर्वाधिक सफल टोली ब्राजिलबिरुद्ध नकआउट चरणमा खेल्दा मेक्सिकोका मुख्य हतियार हुन्, हिर्भिङ लोजानो । पहिलो पटक विश्वकप फुटबलको अनुभव बटुलिरहेका लोजानोले समूहगत चरणको पहिलो खेलमै साबिक विजेता जर्मनीविरुद्ध निर्णायक गोल गर्दै आफूलाई स्थापित गरेका छन् । विङ्गरको भूमिकामा टोलीमा रहेका लोजानो बल पाउना साथ पोस्ट्मा लैजान र गोल गर्न माहिर छन् ।
विपक्षीलाई छलाउन, बल खोस्न र छोटो पास खेल्न पनि उनी खप्पिस छन् । आवश्यक पर्दा अरूलाई पास दिन कन्जुस्याइँ नगर्ने लोजानो निकै मेहनती स्वभावका खेलाडी हुन् । मैदानमा उनी शतप्रतिशत डटेर खेल्छन् । लङ सट र फ्रिकिक हान्न पनि पनि लोजानो टोलीको रोजाइमा पर्छन् । ब्राजिलको बलियो रक्षापंक्तिलाई टक्कर दिँदै टोलीलाई अघिल्लो चरणमा पुर्याउन लोजानोको मुख्य भूमिका रहनेछ ।
पहिलो खेलमै जर्मनीविरुद्घ गोल गरेपछि एकाएक चर्चामा आएका लोजानो अहिले घरेलु क्लब पीएसभीबाट व्यावसायिक फुटबल खेल्छन् । मेक्सिकोकै पाच्युका फुटबल एकेडेमीबाट फुटबल कला सिकेका लोजानोले सन् २०१४ देखि सन् २०१७ सम्म पाच्युकाबाटै खेले । सन् २०१५ मा मेक्सिकोको यू-२० युवा टोलीमा डेब्यु गरेका लोजानो सन् २०१६ देनि भने सिनियर राष्ट्रिय टोलीमा छन् ।
यू-२० र यू-२२ स्तरका प्रतियोगिताको अनुभव सँगाल्दै ओलम्पिकमा समेत टोलीका लागि नियमित गोल गरेका लोजानोलाई डीबक्स नजिक रोक्न जस्तोसुकै बलियो रक्षकलाई पनि हम्मेहम्मे पर्छ । सन् २०१६ मा सिनियर टोलीमा डेब्यु गरेमा लोजानोले राष्ट्रिय टोलीका लागि खेलेका ३१ खेलमा आठ गोल गरिसकेका छन् ।
प्रतिक्रिया दिनुहोस !
