काठमाडौँ: अर्थमन्त्री डा. युवराज खतिवडाले मदिरा र विलासिताका बस्तुमा समाजावाद नखोज्न सुझाव दिएका छन् । 'कस्ता खाले करका सिद्धान्त अपनाएका छौँ भन्ने ढंगबाट कर नीति अपनाइएको छ', आर्थिक विधेयकमाथि संशोधन दर्ता गराएका सांसदहरुको प्रश्नको जवाफ दिँदै उनले सोमबार संसदमा भने, 'मदिरा र विलासिताको वस्तुमा समाजवाद नखोज्नुस ।'
आर्थिक विधेयकमाथि संशोधन दर्ता गराएका सांसदहरुले उठाएको प्रश्नको जवाफ दिने क्रमा उनले आन्तरिक उत्पादन र उद्योग संरक्षणमा ध्यान दिएको बताए । 'विलासी, स्वास्थ्यमा असर पार्ने वस्तुमा कर बढाएका छौँ, आन्तरिक उत्पादन र उद्योगलाई संरक्षणमा ध्यान दिइएको छ', उनले भने, 'तीन पुस्तासम्मको सम्पत्ति हस्तान्तरमा कुनै कर लाग्दैन, कृषियोग्य जमीनमा व्यापक रुपमा हुँदै आएको प्लटिङलाई रोक्न पाँच प्रतिशत कर लगाइएको हो । हामीले प्रगतिशील कर प्रणालीको ढाँचा अपनाएका छौँ ।'
शिक्षा र स्वास्थ्यमा नागरिकले तिर्ने करलाई व्यवस्थित गर्न तथा दूरसञ्चार कम्पनीले पाउनुपर्ने सेवा र करको दायरा खुम्चने भएकाले ११ प्रतिशत लगाइँदै आएको करमा २ प्रतिशत बढाएर १३ प्रतिशत पुर्याइएको बताउँदै डा खतिवडाले किसानलाई व्यवसायमै अनुदान दिने भएको हुँदा मूल्य अभिवृद्धि कर फिर्ता लिने कुरा जायज नभएको टिप्पणी गरे ।
'कर प्रणालीलाई पारदर्शी, करदातामैत्री विलासिताकामा बढी आवश्यकता र उत्पादनका क्षेत्रमा कम कर लगाइने नीति अपनाएका छौँ', उनले भने, 'हामीले आवश्यकता पूरा भएपछि मात्र निकासी गर्ने कि नगर्ने भन्ने नीतिका आधारमा रोडाढुंगा निकासीसम्बन्धीको विषयलाई टुङ्ग्याउनुपर्छ ।'
विश्व व्यापार संगठन र साप्टाका कारण कतिपय वस्तुमा चाहेर पनि कर बढाउन नसकिने बताउँदै अर्थमन्त्रीले आयकरका दर दक्षिण एशियाली मुलुकका हाराहारीमै रहेको दाबी गरे ।
प्रतिक्रिया दिनुहोस !
