बेसीशहरः ब्लड क्यान्सरबाट पीडित उदीपुरका गौरव सिलवालको उपचारका लागि स्पेनमा रहेका प्रवासीहरुले सहयोग गरेका छन् ।
स्पेनमा रहेको नेपाली समाज पाइस भास्कोमा आवद्ध नेपालीले सिलवालको उपचारका लागि ५८ हजार २ सय ८३ रुपैयाँ पठाएका हुन् । बेसीशहर नगरपालिका–१ उदिपुरका १७ वर्षीय सिलवालको हाल काठमाण्डौस्थित सिभिल अस्पतालमा उपचार भइरहेको छ ।
छोराको उपचारका लागि जुटाएको रकम सकिएपछि बेखर्ची अभिभावकले मिडियामार्फत् आर्थिक सहयोगको अपिल गरेपछि प्रवासीहरुले रकम उठाएर पठाएका हुन् । उक्त रकम अन्नपूर्णकर्मी नवीनराज कुइँकेलमार्फत् विरामीका बुबा मिलनबाबु सिलवालाई हस्तान्तरण गरिएको छ ।
स्पेन भास्कोमा बस्ने ३१ जनाले सहयोग रकम संकलन गरेका थिए । त्यहाँ रहेका चोगबा शेर्पा, रमेश पण्डित, कृष्ण सिग्देल, इन्द्रबहादुर गुरुङ, हिमालय रेष्टुरेष्ट, रघुनाथ विष्ट, तारादेवी पोख्रेल, प्रकाशबाबु त्रिपाठीले सहयोग गरेका हुन् ।
सहयोग गर्नेमा साहिला अलिमान्ता सियोन, गंगाराम सापकोटा, दयाराम भट्टराई, दीपेन्द्रप्रसाद आचार्य, ईश्वर बस्ताकोटी, सविन बस्नेत, रमिला चौलागाई र सुरेन्द्र पौडेल
छन् ।
यस्तै श्वैजन अधिकारी, निर्मला पौडेल, अर्विन्दकुमार यादव, गगन भण्डारी, विश्सु खड्का, तिलक गुरुङ, तिलक खड्का, रमेश तामाङ, हरि गुरुङ, स्वागत सेढाई, दामोदर निरौला, महनारायण चौधरी, पूर्णप्रसाद राई, कृष्ण परियार र ऋषि आचार्यले सहयोग रकम जुटाएका थिए ।
सिलवालको उपचारमा समस्या भएकोबारे अन्नपूर्ण पोष्ट न्युज पोर्टल र अन्नपूर्णपोष्ट दैनिक पत्रिकामा समाचार आएपछि अन्नपूर्ण मिडिया नेट्वर्कका अध्यक्ष रामेश्वर थापाले एक लाख दश हजार रुपैयाँ नगद सहयोग गरेका थिए ।
गौरव सिग्मा कलेजमा १२ कक्षामा अध्ययनरत छन् । छोराको उपचारका लागि सुरुमा खर्च धान्न सकिएला भन्ने सोंच राखे पनि खर्च धान्न नसकेपछि सहयोगको अपिल गरिएको आमा सुशीलाले बताइन ।
निजामती कर्मचारी अस्पतालमा उपचाररत गौरवलाई तीन साइकल केमोथेरापी दिइसकिएको छ । ६ महिनासम्म अस्पतालमा राखेर उपचार गर्नुपर्ने भएपछि सिलवाल परिवारलाई खर्च धान्न धौ–धौ छ । हालसम्म करिब १२ लाख खर्च भएको परिवारले जनाएको छ ।
प्रतिक्रिया दिनुहोस !
