मस्को : जारी विश्वकप फुटबलको प्रिक्वार्टरफाइनल चरणको अन्तिम खेलमा मंगलबार राति इङ्ल्यान्ड र कोलम्बिया भिड्दै छन् । यो खेलपछि विश्वकपको २१औं संस्करणको क्वार्टरफाइनलमा पुग्ने अन्तिम टोलीको टुंगो लाग्नेछ । कोलम्बिया समूह ‘एच’को विजेता र इङ्ल्यान्ड समूह ‘जी’को उपविजेताका रूपमा अन्तिम १६ मा पुगेका हुन् । समूहगत चरणको खेलमा यी दुवै टोलीले दुई÷दुई जित हात पारेका छन् भने एक खेलमा पराजय बेहोरेका छन् ।
इङ्ल्यान्ड आफ्नो अन्तिम खेलमा बेल्जियमसँग १–० ले पराजित हुँदै उपविजेता बनेको थियो भने कोलम्बिया अन्तिम खेलमा सेनेगललाई १–० ले हराउँदै विजेता बनेको हो । पछिल्लो दुई संस्करणमा प्रिक्वार्टरफाइनलभन्दा माथिको यात्रा तय गर्न नसकेको इङ्ल्यान्ड यस पटक उपाधिकै योजनामा छ । समूहगत चरणको प्रदर्शनलाई हेर्दा इङ्ल्यान्डले आफ्नो उपाधि योजनामा खरो उत्रने संकेत दिएको छ ।
सन् २०१४ मा ब्राजिलमा भएको विश्वकपको क्वार्टरफाइनल चरणबाटै बाहिरिएको कोलम्बिया पनि आफ्नो त्यो यात्रालाई अझ अघि बढाउने उद्देश्यमा हुनेछ । यद्यपि इङ्ल्यान्ड जस्तो बलियो टोलीसँग प्रतिस्पर्धा गर्नुअघि कोलम्बियालाई आफ्ना स्टार खेलाडी जेम्स रोड्रिगेजको चोटले निकै सताएको छ । ब्राजिल विश्वकपका सर्वाधिक गोलकर्ता रोड्रिगेजले इङ्ल्यान्डविरुद्ध खेल्ने÷नखेल्ने अझै निश्चित भइसकेको छैन । उनको अनुपस्थितिमा हेरी केनजस्ता सशक्त स्ट्राइकर भएको इङ्लिस टोलीसँगको प्रतिस्पर्धा कोलम्बियालाई मुस्किल हुन सक्छ ।
यो खेललाई केन र राडामेल फाल्काओबीचको प्रतिस्पर्धाको रूपमा पनि हेरिएको छ । टोट्टनहामका स्ट्राइकर केन जारी विश्वकपमा पनि इङ्ल्यान्डका महत्वपूर्ण खेलाडी बनेका छन् । टोलीका कप्तानसमेत रहेका उनी समूहगत चरणको खेलमा पाँच गोल गर्दै सर्वाधिक गोल गर्ने खेलाडीको सूचीको शीर्ष स्थानमा छन् । फ्रान्सेली क्लब मोनाकोका स्ट्राइकर फाल्काओ पनि जारी विश्वकपमा टोलीका महत्वपूर्ण खेलाडी हुन् । कोलम्बियाले समूहगत चरणको दोस्रो खेलमा पोल्यान्डविरुद्ध ३–० को जित हात पार्दा फाल्काओले पनि एक गोल गरेका थिए ।
क्लबमा टोलीका मुख्य स्ट्राइकर रहेका उनले राष्ट्रिय टोलीबाट त्यही छवि दोहो¥याउन भने बाँकी नै छ । दुवै टोली स्टार खेलाडीले भरिएकाले खेल भने रोचक हुने निश्चित छ । इङ्लिस टोलीलाई टोट्टनहामका डेली अली, लेस्टर सिटीका जामी भार्डी, म्यानचेस्टर सिटीका रहिम स्टर्लिङ, म्यानचेस्टर युनाइटेडका मार्कस रासफोर्ड र जेसी लिनगार्ड जस्ता क्षमतावान् युवा खेलाडीको साथ छ ।
कोलम्बियासँग पनि राम्रा खेलाडीको कमी छैन । रक्षक ऐरी मिनाले कोलम्बियाका लागि लगातार दुई खेलमा गोल गरेका छन् । विश्वकपमा यसअघि भएको प्रतिस्पर्धाको नतिजाले भने इङ्ल्यान्डलाई बलियो देखाएको छ । मात्र एक पटक सन् १९९८ मा फ्रान्समा भएको विश्वकपमा भेट हुँदा इङ्ल्यान्ड २–० ले विजयी बनेको थियो । समग्रमा भने पाँच पटक एकअर्काविरुद्ध प्रतिस्पर्धा गर्दा इङ्ल्यान्डले तीन खेलमा जित हात पारेको छ । दुई खेल बराबरीमा सकिएको छ ।
विगतमा दुई टोली
कुल खेल : ५
इङ्ल्यान्ड विजयी : ३
कोलम्बिया विजयी : ०
बराबरी : २
इङ्ल्यान्डको यात्रा
ट्युनिसियाविरुद्ध १–२ गोलले विजयी
पानामाविरुद्ध १–६ गोलले विजयी
बेल्जियमविरुद्ध १–० गोलले पराजित
कोलम्बियाको यात्रा
जापानविरुद्ध २–१ गोलले पराजित
पोल्यान्डविरुद्ध ०–३ गोलले विजयी
सेनेगलविरुद्ध ०–१ गोलले विजयी
प्रतिक्रिया दिनुहोस !
