हेरी केन (इङ्ल्यान्ड)
जारी रुस विश्वकपको सर्वाधिक गोलकर्ता हेरी केन इङ्लिस टोलीका महत्वपूर्ण खेलाडी हुन् । कप्तान र स्ट्राइकरको हैसियतमा मात्रै हैन, टोलीको सफलताका लागि उनले पुर्याउने योगदानले केनलाई इङ्लिस राष्ट्रिय टोलीका महत्वपूर्ण खेलाडीको रूपमा उभ्याएको हो । समूहगत चरणको दुई खेलमै पाँच गोल गरेका केनले जारी विश्वकपमा आफ्नो क्षमता र टोलीका लागि आफ्नो महत्व प्रस्ट देखाइसकेका छन् ।
समूहगत चरणको अन्तिम खेलमा प्रशिक्षक गारेथ साउथगेटले केनलाई बेञ्चमै राख्दा इङ्ल्यान्ड बेल्जियमसँग १-० गोलले पराजित हुन पुगेको थियो । प्रिक्वार्टरफाइनल चरणको महत्वपूर्ण खेलमा प्रशिक्षक साउथगेटले केनलाई पहिलो रोजाइमै मैदानमा उतार्ने निश्चित छ । त्यही अवसरमा उनले इङ्ल्यान्डलाई पछिल्लो दुई संस्करणपछि क्वार्टरफाइनलसम्म दोहोर्याउने विश्वास गरिएको छ ।
इङ्ल्यान्ड सन् २०१० मा दक्षिण अफ्रिका र सन् २०१४ मा ब्राजिलमा भएको विश्वकपमा क्रमस प्रिक्वार्टरफाइनल र समूहगत चरणबाटै बाहिरिएको थियो । यस पटक उपाधिको योजनासहित रुस आइपुगेको इङ्ल्यान्डलाई आफ्नो योजनामा सफल बनाउन उनै केनले महत्वपूर्ण भूमिका निर्वाह गर्न सक्नेछन् । घरेलु टोली टोट्टनहामबाट व्यावसायिक फुटबल खेल्दै आएका केन मैदानमा कुनै पनि समय गोल गर्न सक्षम रहन्छन् ।
लामो प्रहारमा निकै सफल देखिएका केन टाउको र खुट्टा दुवैबाट नियमित गोल गर्न सक्छन् । आफ्नो शारीरिक उचाइ र खेल्ने शैलीले केनलाई युरोपेली क्लब फुटबलकै सशक्त स्ट्राइकरका रूपमा दर्ता गराएको छ । सन् १९६६ पछि विश्वकपको दोस्रो उपाधिको खोजीमा रहेको इङ्ल्यान्डले केन र उनीसहितको टोलीबाट धेरै अपेक्षा गरेको छ । सन् २०१५ बाट इङ्लिस टोलीबाट खेल्न थालेका केनले हालसम्म २६ खेल खेल्दै १८ गोल गरेका छन् ।
राडामेल फाल्काओ (कोलम्बिया)
आफ्नो सक्रिय खेलजीवन सन्न्यासको नजिक पुग्दै गर्दा पहिलो पटक विश्वकप खेल्ने अवसर पाएका राडामेल फाल्काओ रुस विश्वकपमा कोलम्बियन टोलीका महत्वपूर्ण खेलाडी हुन् । क्लब फुटबलमा निकै चम्किएका फाल्काओ राष्ट्रिय टोलीबाट भने केही अभागी देखिएका छन् । उनी युरोपका ठूला क्लबहरूबाट चम्किरहेका बेला सन् २०१० को विश्वकपमा कोलम्बिया छनोट नै हुन सकेन ।
सन् २०१४ को विश्वकपमा कोलम्बिया छनोट भयो, तर प्रतियोगिता सुरु हुने बेला उनी घाइते भए । त्यसैले फाल्काओ ३२ वर्षको उमेरमा आएर पहिलो पटक विश्वकप खेल्दै छन् । तर, फ्रान्सेली क्लब मोनाकोबाट व्यावसायिक फुटबल खेल्दै आएका उनी अहिले पनि गोलका लागि लयमै छन् र टोलीका लागि उनको महत्व अझ बढेको छ । उनको अनुपस्थितिमा गत संस्करण प्रत्येक खेलमा गोल गर्दै कोलम्बियालाई क्वार्टरफाइनलसम्म पुर्याएका जेम्स रोड्रिगेज अहिले घाइते छन् ।
उनले प्रतियोगिताका बाँकी कति खेल खेल्न सक्छन् भन्ने अझै निश्चित छैन । यो अवस्थामा टोलीका कप्तान र मुख्य स्ट्राइकरको हैसियतले टोलीलाई अघि बढाउने जिम्मेवारी उनै फाल्काओमाथि आइपरेको छ । र, त्यसमा उनी सफल हुने विश्वास पनि गरिएको छ । फाल्काओ यस्ता क्षमतावान् खेलाडी हुन्, जसको बलसँगको गति निक्कै राम्रो छ ।
गोल अवसरका लागि उनको ‘मुभमेन्ट’, र प्राप्त अवसरमा कुनै पनि अवस्थामा नचुक्ने उनको बानीले टोलीलाई सफलतातर्फ अघि बढाउने गरेको छ । त्यसैले कोलम्बियाले मंगलबार इङ्ल्यान्डसँग प्रतिस्पर्धा गर्दा र त्यसपछिका खेलमा पनि फाल्काओले टोलीका लागि महत्वपूर्ण योगदान पुर्याउने विश्वास गरिएको छ । सन् २००७ देखि कोलम्बियन राष्ट्रिय टोलीबाट खेल्न थालेका फाल्काओले हालसम्म ७६ खेल खेल्दै ३० गोल गरेका छन् ।
प्रतिक्रिया दिनुहोस !
