मस्को : आफ्नो टोली जारी विश्वकप फुटबलको प्रिक्वार्टरफाइनलबाट बाहिरिएलगत्तै स्पेनका प्रभावशाली खेलाडी आन्द्रेस इनिएस्टाले अन्तर्राष्ट्रिय खेल जीवनबाट सन्न्यास लिएका छन् । जारी विश्वकपमा उपाधिको बलियो दाबेदार मानिएको स्पेन आइतबार राति खेलिएको प्रिक्वार्टरफाइनल खेलमा आयोजक रुससँग पेनाल्टी सुटआउटमा पराजित भएको थियो ।
इनिएस्टा स्पेनिस टोलीका निकै अनुभवी खेलाडी हुन् । स्पेनलाई सन् २०१० को विश्वकप जिताउन ३४ वर्षीय मिडफिल्डर इनिएस्टाले महत्वपूर्ण योगदान गरेका थिए । उक्त विश्वकपको नेदरल्यान्ड्स विरुद्घको फाइनलमा इनिएस्टाले नै स्पेनका लागि निर्णायक गोल गरेका थिए । निर्धारित समयको खेल गोलरहित बराबरीमा सकिएपछि थप गरिएको समय (११६औं मिनेट) मा निर्णायक गोल गर्दै उनले टोलीलाई पहिलोपटक विश्वकपको उपाधि चुमाएका थिए ।
रुस विरुद्घको खेलमा उनी परिवर्तित खेलाडीका रूपमा मैदानभित्र प्रवेश गरेका थिए । पेनाल्टी सुटआउटमा पनि स्पेनको तर्फबाट उनले नै पहिलो प्रहार गर्दै गोल छिराएका थिए । राष्ट्रिय टोलीबाट एक सय ३१ खेल खेलेका इनिएस्टाले १३ गोल गरेका छन् । ‘राष्ट्रिय टोलीबाट सन्न्यासको घोषणा गर्नु मेरा लागि निकै दु:खद क्षण हो’, उनले भनेका छन् । उनले टोलीलाई दोस्रोपटक विश्वकप दिलाउने अभियान सफल हुन नसकेकोमा पनि दु:ख व्यक्त गरे ।
खेलका क्रममा जस्तोसुकै अप्ठ्यारो स्थितिमा पनि साथीलाई सही पास निकाल्न सक्ने उनको गजबको क्षमता थियो । उनी समकालीन विश्व फुटबलकै उत्कृष्ट प्लेयरमध्ये एक हुन् । ‘मैले स्पेनिस टोलीमा रहेर धेरै गौरवपूर्ण क्षण बिताएको छु, राष्ट्रिय टोलीबाट अलग भए पनि ती क्षणहरू मेरो मानसपटलमा सधैं जीवन्त रहनेछ’, उनले भनेका छन् ।
सन् २००६ मा राष्ट्रिय टोलीमा ‘डेब्यु’ गरेका इनिएस्टाले विश्वकपसँगै स्पेनलाई दुईपटक युरोपियन च्याम्पियनसिपको उपाधि पनि जिताएका छन् । स्पेनले सन् २००८ र सन् २०१२ मा युरोकप जित्दा उनी टोलीका महत्वपूर्ण सदस्य थिए । करिब २२ वर्ष स्पेनिस क्लब बार्सिलोनामा बिताएका इनिएस्टा केही समयअघि मात्र उक्त क्लब छाडेर जापानी क्लब भासिल कोबेमा आबद्ध भएका थिए ।
इनिएस्टा केवल १२ वर्षको उमेर बार्सिलोनासँग जोडिन पुगेका थिए । बार्सिलोनाले ३२ वटा महत्वपूर्ण उपाधि जित्दा उनी टोलीका सक्रिय सदस्य थिए । ‘वास्तवमा इनिएस्टा स्पेनिस फुटबलको एउटा इतिहास नै हुन्’, स्पेनिस टोलीका प्रशिक्षक फर्नान्डो हिएरोले भनेका छन् । हिएरो आफैं पनि स्पेनिस टोलीका पूर्वखेलाडी हुन् ।
प्रतिक्रिया दिनुहोस !
