धरान : अखिल नेपाल फुटबल संघ (एन्फा)को विवादका कारण स्थगित भएको राष्ट्रिय लिग फुटबल आगामी वर्षदेखि नियमित सञ्चालन हुने भएको छ । एन्फाको विवादका कारण अलपत्र परेको धरानस्थित एन्फा टेक्निकल सेन्टरको निरीक्षण गर्न सोमबार आएका एन्फाका अध्यक्ष कर्माछिरिङ शेर्पाले पत्रकारसँग कुरा गर्दै लिगलाई निरन्तरता दिने बताए ।
शेर्पाले २०७६ देखि सहिद स्मारक राष्ट्रिय लिग र पे्रसिडेन्ट कपलाई निरन्तरता दिने, मोफसलमा सञ्चालन हुँदै आएका फुटबल प्रतियोगिताको समेत स्तरोन्नति गरी सातवटै प्रदेशमा फुटबलको विकासलाई जोड दिइने बताए । कानुन अभावका कारण फुटबल क्षेत्रको विकास गर्न समस्या भएको भन्दै शेर्पाले एन्फाको कानुन बनाई जिल्ला लिगसमेत सञ्चालन गर्ने बताए । उनले लामो समयदेखि बन्द रहेका एन्फा टेक्निकल सेन्टरहरू आगामी शैक्षिक सत्रबाट सञ्चालनमा ल्याइने पनि बताए ।
२०५७ सालमा विश्व फुटबल संघ (फिफा)को गोल प्रोजेक्टमार्फत एन्फाले धरान नगरपालिकासँग ३० वर्षका लागि जग्गा भाडामा लिएर टेक्निकल सेन्टर स्थापना गरेको थियो । २०५९ सालमा निर्माण सम्पन्न भएको उक्त सेन्टर २०६६ देखि २०७० सालसम्म सञ्चालन भएर बन्द भएको छ । शेर्पाले बन्द टेक्निकल सेन्टर सञ्चालन गर्ने प्रतिबद्धता पनि जनाएका छन् ।
प्रतिक्रिया दिनुहोस !
