दमौली : विद्यालय जाने क्रममा सडकमा रुख ढल्दा च्यापिएर व्यास नगरपालिका-६ शेखाटारमा एकको मृत्यु भएको छ। घटनामा परी एकै परिवारका तीन दिदीबहिनीमध्ये एकको मृत्यु र दुई गम्भीर घाइते भएका हुन्।
नजिकैको कालिका इंग्लिस बोर्डिङ स्कुल जाँदै गर्दा मंगलबार बिहान करिब साढे ९ बजेतिर दुर्घटना भएको हो। केही दिनयता अविरल वर्षले रुख मक्किएको थियो। रुख ढल्दा तीनैजना घाइते भएका थिए।
घटनालगत्तै पुगेको प्रहरी र स्थानीय बासिन्दाको टोलीले घाइते सबैलाई दमौली पुर्याएको थियो । घटनास्थल दमौलीबाट करिब तीन किलोमिटर उत्तरपश्चिममा पर्दछ। घाइतेलाई उपचारका लागि दमाैली पुर्याइएकी १० वर्षीया विनिशा थापाकाे बिहान पौने ११ बजे मृत्यु भएको हो। उनी दिदीबहिनीमा माइली हुन् ।
रुखले च्यापेर दुवै खुट्टा भाँचिएकी आठ वर्षीया युनिसा थापा र कुम भाँचिएकी १२ वर्षीया अस्मिता थापाको पोखरास्थित मणिपाल शिक्षण अस्पतालमा उपचार भइरहेको प्रहरी उपरीक्षक सिद्धिविक्रम शाहले बताए ।
प्रतिक्रिया दिनुहोस !
