मस्को : जारी विश्वकपमा उपाधिको दाबेदार मानिएको स्पेन प्रिक्वार्टरफाइनल खेलमा आयोजक रुससँग पराजित भएपछि टोलीका अनुभवी खेलाडी डिएगो कोस्टा प्रशिक्षक फर्नान्डो हिएरोसँग रिसाएका छन् । आइतबार खेलिएको प्रिक्वार्टरफाइनल खेलमा रुसले सन् २०१० को उपाधि विजेता स्पेनलाई पेनाल्टी सुटआउटमा ४–३ गोलले हराएको थियो ।
निर्धारित र थप गरिएको समयको खेल १–१ गोलको बराबरीमा सकिएपछि हारजितका लागि पेनाल्टी सुटआउटको सहायता लिइएको थियो । पेनाल्टी प्रहारका लागि कोकेलाई पठाउने वा नपठाउने विषयमा प्रशिक्षक हिएरो र स्ट्राइकर कोस्टाबीच कुराकानी भएको थियो । पहिले प्रशिक्षक हिएरोले मिडफिल्डर कोकेलाई उनी पेनाल्टी प्रहारका लागि तयार रहे वा नरहेको विषयमा सोधेका थिए । कोकेले आफू पेनाल्टी प्रहारका लागि पूर्ण रूपमा तयार रहेको जवाफ फर्काएका थिए ।
तर, त्यसअघि नै कोस्टाले कोकेलाई पेनाल्टी प्रहारका लागि पठाउनु उपयुक्त नहुने सल्लाह हिएरोलाई दिएका थिए । एउटै क्लबबाट व्यावसायिक फुटबल खेल्ने भएकाले कोकेको विषयमा आफूलाई धेरै जानकारी रहेको कोस्टाको दाबी थियो । कोस्टा र कोके दुवै स्पेनिस क्लब एट्लेटिको म्याड्रिडबाट व्यावसायिक फुटबल खेल्छन् । कोस्टाले हिएरोलाई पेनाल्टी प्रहारका लागि कोके मानसिक रूपमा पनि तयार नरहेको सुझाव दिएका थिए ।
यसका बीच कोके आफैंले पेनाल्टी प्रहारका लागि आफू तयार रहेको बताएपछि प्रशिक्षक हिएरोले उनलाई मैदानमा पठाएका थिए । तेस्रो नम्बरमा कोके पेनाल्टी प्रहारका लागि आउँदा दुवै टोली २–२ गोलको बराबरीमा रहेका थिए । तर, कोकेको प्रहारलाई रुसका गोलरक्षक इगोर एकिनफिभले विफल पारेपछि स्पेन जितबाट टाढिएको थियो । त्यसपछि पाँचौं नम्बरमा आएका इयागो असपास पनि पेनाल्टी प्रहारमा चुकेपछि स्पेन दोस्रो चरणबाटै घर फर्कन बाध्य भएको थियो ।
आफ्नो सल्लाह नमानेकाले स्पेन उपाधि होडबाट बाहिरिएको भन्दै कोस्टा प्रशिक्षक हिएरोसँग रिसाएको सञ्चारमाध्यमले जनाएका छन् । ‘कोकेलाई पेनाल्टी प्रहारमा नपठाउन मैले पहिले नै प्रशिक्षकलाई सचेत गराएको थिएँ । एउटै क्लबबाट व्यावसायिक फुटबल खेल्ने भएकाले पनि मलाई कोकेको बारेमा धेरै कुरा थाहा थियो । तर, प्रशिक्षकले मेरो सुझाव नमान्दा हामीले हार बेहोर्नु प¥यो’, कोस्टाले भनेका छन् ।
प्रतिक्रिया दिनुहोस !
