ऐरी मिना(कोलम्बिया)
रुस विश्वकपमा प्रिक्वार्टरफाइनल चरणको खेल सकिँदासम्म धेरै अपत्यारिला नतिजा आइसकेका छन् । उपाधि दाबेदार मानिएका केही ठूला टोली समूहगत चरण र केही प्रिक्वार्टरफाइनल चरणबाटै घर फर्किएका छन् ।
यस अवधिमा केही यस्ता युवा खेलाडी देखिए, जसले कम उमेर र विश्वकपको पहिलो सहभागितामै सशक्त प्रदर्शन गर्न सफल भए । यहीमध्येका खेलाडी हुन् कोलम्बियाका ऐरी मिना । २३ वर्ष पुगेका यी खेलाडीले समूहगत चरणको खेलमै आफ्नो गतिलो छाप छाड्न सफल भए । कम उमेरका बाबजुद ऐरी मिनाको खेल्ने पोजिसन पनि रक्षक हो । रक्षकमा खेलेर पनि जारी विश्वकपमा उनी टोलीका लागि महत्वपूर्ण गोल गर्न सफल भए । समूहगत चरणको पहिलो खेलमा जापानसँग पराजित भएपछि कोलम्बियालाई प्रिक्वार्टरफाइनल चरणमा स्थान सुरक्षित गर्न बाँकी रहेको दुई खेलमा कुनै पनि अवस्थामा जित अत्यावश्यक थियो । त्यसपछि दोस्रो खेलमा पोल्यान्डलाई ३-० ले पराजित गर्दा कोलम्बियाका लागि पहिलो गोल नै उनै मिनाले गरेका थिए ।
त्यसपछि अन्तिम खेलमा सेनेगललाई १-० गोलले पराजित गर्दै कोलम्बियाको अन्तिम १६ को यात्रा तय गर्दा उनै मिनाले निर्णायक गोल गरेका थिए । मंगलबार राति भएको इङ्ल्याण्डविरूद्ध प्रिक्वाटरफाइनल खेलमा पनि इङ्ल्याण्ड जितको नजिक पुगेको अवस्थामा खेल सकिन २ मिनेट छँदा कर्नर प्रहारलार्इ हेडमार्फत गोल गरी खेललार्इ अतिरिक्त समय हुँदै ट्राइब्रेकरसम्म पुर्याउन ऐरी मिना नै निर्णायक बने यद्यपी उनको टोली ट्राइब्रेकरमा इङ्ल्याण्डसँग पराजित भर्इ विश्वकपबाट बाहिरियो ।
रक्षापंक्तिमा विपक्षी टोलीलाई गोलबाट रोकेर मात्रै हैन, गोल गरेर समेत उनी कोलम्बियालाई रुस विश्वकपमा बलियो उपस्थिति देखाउन सफल भए । दुवै खुट्टाले उत्तिकै कुशलताका साथ खेल्न सक्ने क्षमताका खेलाडी उनी रुस विश्वकपमा सहभागीमध्ये उत्कृष्ट युवा खेलाडीको सूचीमा अघि देखिए । सन् २०१६ देखि राष्ट्रिय टोलीबाट खेल्न थालेका मिनाले अहिलेसम्म १५ खेल खेल्दा ६ गोल गरिसकेका छन् ।
केलियन एम्बाप्पे (फ्रान्स)
रुस विश्वकपको उत्कृष्ट युवा खेलाडीको अवार्डका लागि बलियो दाबेदारमा देखिएका खेलाडी हुन्, केलियन एम्बाप्पे । भर्खर १९ वर्ष पुगेका एम्बाप्पेले प्रिक्वार्टरफाइनल चरणको खेलमा अर्जेन्टिनाविरुद्ध गरेको प्रदर्शनले उनलाई चर्चाको शिखरमा पुर्याएको छ । उनकै उत्कृष्ट प्रदर्शनमा दुई पटकको उपाधि विजेता लियोनल मेसीको टोली अर्जेन्टिना प्रिक्वार्टरफाइनलबाटै घर फर्किएको छ ।
फ्रान्सले अर्जेन्टिनालाई ४-३ गोलले पराजित गर्दा टोलीका लागि दुई गोल उनै एम्बाप्पेले गरे । अर्काे एक गोल पनि उनकै कारणले सम्भव भएको थियो । डी बक्सभित्र उनलाई लडाएपछि प्राप्त पेनाल्टी अवसरमा एन्टोइन ग्रिजम्यानले टोलीलाई १-० ले अघि बढाएका थिए । त्यसपछि उनी एक्लैले दुई गोल थप्दा फ्रान्सले बलियो मानिएको अर्जेन्टिनालाई सहजै पराजित गरेको थियो । उनले समूहगत चरणका खेलमा समेत गोल गरेका छन् ।
फ्रान्सले समूहगत चरणको दोस्रो खेलमा पेरुविरुद्ध १-० को जित निकाल्दा पनि उनै एम्बाप्पेले निर्णायक गोल गरेका थिए । फुटबल कलासँगै बलसँगको तीव्र गतिका खेलाडी एम्बाप्पेलाई विश्वकप फुटबलको पहिलो सहभागितामै सर्वकालीन महान् फुटबलर पेलेसँग नै तुलना गर्न थालिएको छ । पेलेको स्तरमा पुग्न उनलाई यस्ता ठूला प्रतियोगितामा अझै सशक्त प्रदर्शन दिन आवश्यक छ ।
यद्यपि जारी विश्वकपमा उत्कृष्ट युवा खेलाडीको अवार्ड प्राप्त गर्नका लागि भने उनलाई प्रिक्वार्टरफाइनल सम्मको खेलको प्रदर्शनले लगभग पर्याप्त देखिएको छ । टोलीका लागि तीन गोल गरिसकेका एम्बाप्पेले आगामी खेलमा अझै सशक्त प्रदर्शन गर्ने विश्वास गरिएको छ । त्यो प्रदर्शनसँगै उनको क्षमता र प्रख्यातिले थप नयाँ उचाइ लिनेछ ।
प्रतिक्रिया दिनुहोस !
