जनकपुरधाम : प्रदेश २ सरकारले बेग्लै कर्मचारी राख्ने तयारी गरेको छ । धनुषाको जनकपुरमा मंगलबार आयोजित संक्रमणकालीन संघीयताको व्यवस्थापन विषयक कार्यक्रममा मुख्यमन्त्री लालबाबु राउतले यसबारे जानकारी दिएका हुन् । संघीय सरकारले कर्मचारी सरुवामा मनपरी गरेर प्रदेश सरकारलाई हेपेको उनको गुनासो छ ।
‘रातारात कर्मचारी सरुवा हुन्छ तर प्रदेश सरकारलाई जानकारी हुँदैन’, उनले भने । यसरी सचिवहरूको सरुवा हुँदा काम गर्न कठिनाइ भइरहेको उनको भनाइ छ । ‘एक त प्रदेश सरकार शिशु अवस्थामा छ, त्यसमा पनि कर्मचारी नयाँ छन्’, उनले भने । उनले यस्ता विषयमा केन्द्र सरकार गम्भीर नबने नयाँ विधेयक बनाएर करारमा बेग्लै कर्मचारी राख्नबाट पछि नहट्ने चेतावनी दिए ।
संघीयतालाई लिएर अहिले चार किसिमको संक्रमणकालीन अवस्था रहेको उनको भनाइ थियो । उनका अनुसार यथास्थितिवादी सोच, संघीय सरकारबाट असहयोग, उच्च प्रशासनिक तहमै संघीयता सफल हुनेप्रति शंकाजस्ता कुरा छन् । ‘संघीयता सफल नहुनु भनेको देश झन् खाडलमा फस्नु हो’, उनले भने, ‘त्यसैले प्रदेश २ समृद्ध हुनु भनेको देश समृद्ध हुनु हो, संघीयता पनि सफल हुनु हो ।’
प्रदेश सरकारले बेग्लै कर्मचारी संयन्त्र खडा गर्नका लागि मस्यौदासमेत तयार गरेको छ । जसको नाम प्रादेशिक प्रशासनका लागि आवश्यक कर्मचारी भर्नासम्बन्धी विधेयक २०७५ राखिएको छ । मस्यौदा विधेयक मस्यौदा सहजीकरण समितिका संयोजक एवं प्रदेशका महान्यायाधिवक्ता दीपेन्द्र झाले प्रदेश सरकारलाई हस्तान्तरण गरेका छन् ।
झाका अनुसार मस्यौदा विधेयकमा केन्द्र सरकारले आवश्यकताअनुसार कर्मचारी नदिएको खण्डमा प्रदेश सरकारले थप कर्मचारी राख्न पाउने व्यवस्था प्रस्ताव गरिएको छ । प्रदेश सरकारले निश्चित समयका लागि कर्मचारी राख्न सक्ने नीति बनाइएको उनले सुनाए । लोकसेवा आयोगबाट पदपूर्ति नहुन्जेल प्रदेश सरकारले सहसचिवस्तरका कर्मचारी राख्न मिल्ने गरी मस्यौदा विधेयक तयारी गरेको जनाइएको छ ।
प्रतिक्रिया दिनुहोस !
