जनकपुरको हिलाम्य सडकमा युवाले रोपे धान

जनकपुरधामः दुई दिन पानी परेपछि हिलाम्य भएको प्रदेश २ को राजधानी जनकपुरमा युवाहरुले सडकमै धान रोपेका छन् ।  नेविसंघ आवद्ध युवाहरुले जनकपुरका नगरप्रमुख लालकिशोर साहको विरोध गर्दै सडकमै धान रोपेका हुन् । युवाहरुले बुधबार स्थानीय शिव चोकमा धान रोपी नगर प्रमुख साहमाथि व्यंङ्यात्मक विरोध गरेका हुन् ।

एकीकृत शहरी विकास आयोजना अन्तर्गत नगरक्षेत्रमा भइरहेको सडक निर्माणमा कार्यमा भएको सुस्तीले नगरका प्रमुख सडकहरु नै हिलाम्य भएको छ । सडकमा हिलो र पानी जमेपछि सर्वसाधारणलाई आवत जावत गर्न समस्या हुँदै आएको छ ।

जनकपुरका अधिकांश सडकहरु सामान्य वर्षामा समेत हिलाम्य हुने गरेपनि उपमहानगरपालिकाका प्रमुख साहले समाधानतर्फ चासो नदेखाएको भन्दै ध्यानाकर्षण गराउन आफूहरुले सडकमै धान रोपेको नेवि संघ धनुषाका सभापति सुजीतकुमार झाले जनाए । 

दुई दिनको वर्षामा जनकपुर नगर क्षेत्र हिलाम्य हुनुका साथै घरघरमा पानी छिरेको छ तर नगरप्रमुखले यस्ता समास्या समाधान गर्नतर्फ ध्यान नदिएको झाको आरोप छ । नगर प्रमुखले विकासको चर्को नारा दिएपनि नगरवासीले भने अनुभूति गर्न नसकेको भन्दै यथाशीघ्र समस्या समाधान नगरिए नेवि संघले कडा आन्दोलनमा जान बाध्य हुने चेतावनी समेत दिएको छ ।

नेविसंघ नगर कमिटीका अध्यक्ष सुमन ठाकुरको नेतृत्वमा गरिएको प्रदर्शनमा जिल्ला अध्यक्ष झासहित रवि शर्मा, माया कुमारी, सलीम साफी, परवेज आलम लगायतका युवाहरुको सहभागिता थियो ।