चैनपुर : असार बित्न लाग्दासमेत साना उद्योग व्यवसायीलाई अनुदान दिनुपर्ने रकम खर्च हुन सकेको छैन ।
घरेलु तथा साना उद्योग विकास कार्यालयबाट उद्योग व्यवसायीलाई दिनुपर्ने सामग्री सूचना प्रकाशन गरी सप्लायर्सबाट सामान खरिद गर्नुपर्ने हो । तर, कार्यालय प्रमुख सन्तोषी नेपालीको सप्लायर्सबाट कमिसनको चलखेल नमिल्दा सामग्री ढुवानीमा ढिलाइ हुने भएपछि यस वर्षको कार्यक्रमको रकम फ्रिज हुने निश्चित भएको व्यवसायीको भनाइ छ । २३ लाखको उपभोक्तासँग सम्झौता गर्न ढिलासुस्तीले कार्यक्रम नहुने भएपछि अनुदान पाउन छनोट भएका व्यवसायी आक्रोशित भएका छन् ।
कार्यालयको उपयुक्त प्रविधि हस्तान्तरण कार्यक्रमअन्तर्गत कुखुरा फर्म, सिलाइकटाइ, व्यवसायी तरकारी खेती, मासु पसल फर्निचरका उद्योगी व्यवसायीका लागि दिनुपर्ने सामग्री कमिसनको तालमेल नमिल्दा सामान खरिदका लागि सूचना प्रकाशन नगरेको छनोटमा परेका कुखुरा व्यवसायी लोकेन्द्र्र खड्काले आरोप लगाए ।
घरेलु विकासको साना अनुदान कार्यक्रमका लागि ३ महिनाअघि नै ३० जना उद्योगी व्यवसायी किसानलाई छनोट गरिएको थियो ।
‘उपयुक्त प्रविधि हस्तान्तरणमार्फत प्रतिव्यक्ति ५० हजारदेखि एक लाखसम्म अनुदान सामग्री पाइने भनी निवेदन माग गरियो’, चैनपुरमा कुखुरा व्यवसायी गर्दै आएका लोकेन्द्र खड्काले भने, ‘तर हाकिमको गलत नियतले हामीले सरकारी सेवाबाट वञ्चित गराइयो ।’
उनीजस्तै अर्का सिलाइकटाइका व्यवसायी मीनबहादुर दमाईंले पनि सिलाइकटाइ मेसिन पाइएला भनेर ढुक्क भएको बताए । तर, हाकिमले कार्यक्रम हँुदैन भनेपछि निरास भएको गुनासो पोखे । कार्यालयबाट छनोट भएका व्यवसायीबाट एक÷एक हजारसमेत कार्यालयले असुल गरेको उनीहरूको आरोप छ ।
विभागबाट आर्थिक वर्षको दोस्रो चौमासिकमा निकासा भएको कार्यक्रमको बजेट कार्यालय प्रमुख नेपालीले धनगढीमा रहेका सप्लायर्ससँग पैसाको लेनदेन नमिल्दा कार्यक्रम ढिलासुस्ती गरेको घरेलु विकास कार्यालयका एक कर्मचारीले बताए । कार्यालय प्रमुख सन्तोषी नेपालीले कार्यक्रममा कुनै गलत नियत नभएको प्रविधिका कारण ढिला भएको जानकारी दिइन् ।
आर्थिक वर्ष ०७३÷७४ मा समेत कार्यालय प्रमुख नेपालीले कमिसन छनोट गरेको सेवाग्राहीले गुनासो गरेका छन् । पोल्टी फर्मका सञ्चालक नरेन्द्र खड्काले १ लाख अनुदान पाएका थिए । त्यसमा २३ हजार रुपैयाँ घरेलु विकासलाई बुझाएको जानकारी दिए । ‘घरेलु विकासले सामग्री खरिद गरी बुझ्दा ५० हजारको सामान आयो’, उनले भने, ‘सामान नलिने अख्तियारमा जाने भनेपछि नेपालीले ४० हजार नगद फिर्ता गरेको हो ।’ । गत वर्ष खरिद गरेको सामानमा नेपालीले सप्लायर्ससँग मिलेर दोब्बर मूल्यवृद्धि गरेको उनको आरोप छ ।
कार्यालय प्रमुख नेपालीले गत वर्ष ५० लाखको कार्यक्रममा २० लाख फ्रिज भएको र यस वर्ष जिल्लामा व्यवसायीलाई खरिद गर्ने सामग्री सप्लायर्स नभएकाले काम गर्न कठिन भएको जानकारी दिइन् । व्यवसायीले कमिसन चलखेलले काम नभएको भन्ने आरोप झुट भएको बताइन् ।
प्रतिक्रिया दिनुहोस !
