मस्को : रुस विश्वकपको दोस्रो क्वार्टरफाइनल खेलमा शुक्रबार उपाधिको दाबेदार मानिएका दुई टोली ब्राजिल र बेल्जियम एकअर्काविरुद्ध भिड्दै छन् । यो खेलले विश्वकपमा ब्राजिलको दबदबा कायम रहने वा उपाधिका लागि नयाँ टोलीको उदय हुनेमध्ये एउटा सम्भावनालाई जीवित राख्नेछ । ब्राजिल र बेल्जियममा जारी विश्वकपमा सशक्त प्रदर्शन गर्दै क्वार्टरफाइनलसम्म आइपुगेका टोली हुन् ।
यी दुवै टोलीले क्वार्टरफाइनल चरणअघिका चार खेलमा पराजय बेहोरेका छैनन् । ब्राजिल प्रिक्वार्टरफाइनल चरणमा मेक्सिकोलाई २–० र बेल्जियम एसियाली टोली जापानलाई ३–२ गोलले पराजित गर्दै अन्तिम आठमा पुगेका हुन् । प्रतियोगिताकै सशक्त यी दुई टोलीबीचको यो खेललाई सर्वाधिक सफलविरुद्ध सदाबहार टोलीको प्रतिस्पर्धाको रूपमा समेत हेरिएको छ ।
बेल्जियम यस्तो टोली हो, जो सधैं बलियो रहेर पनि विश्वकपजस्ता ठूला प्रतियोगिताको उपाधि होडमा पछि पर्दै आएको छ । बेल्जियमसँग यस पटक पनि आफ्नो त्यही अभागी छविलाई परिवर्तन गर्ने चुनौती छ । बेल्जियमले जापानविरुद्ध दोस्रो हाफमा दुई गोलले पछि परेको अवस्थाबाट उत्कृष्ट ‘कमब्याक’ गर्दै ३–२ को जित हात पारेको थियो । बेल्जियमको यो कमब्याक विश्वकप फुटबलको नकआउट चरणमा ९० मिनेटभित्र कुनै पनि टोलीले गरेको ५२ वर्षपछिको उत्कृष्ट कमब्याक हो । यसअघि पोर्चुगलले सन् १९६६ मा दक्षिण कोरियाविरुद्ध यस्तै उत्कृष्ट कमब्याकसहित जित हात पारेको थियो ।
त्यही प्रदर्शनबाट हौसिएको बेल्जियमले ब्राजिलविरुद्ध जित निकाल्न सक्ने सम्भावना पनि छ । यद्यपि त्यसका लागि बेल्जियमले जारी प्रतियोगितामा केही कमजोर देखिएको आफ्नो रक्षापंक्तिमा व्यापक सुधार गर्नु आवश्यक छ । बलियो बेल्जियमसँगको खेलअघि ब्राजिललाई भने आफ्नो दुई सशक्त खेलाडी मार्सेलो र कासेमिरोको अनुपस्थितिले केही चिन्ता थपेको छ।
चोटग्रस्त मार्सेलोले बेल्जियमविरुद्ध खेल्ने निश्चित भइसकेको छैन भने लगातार दुई खेलमा पहेँलो कार्ड बेहोरेका कासेमिरो निलम्बनमा छन् । यद्यपि जारी प्रतियोगिताका सबै खेलमा आक्रमण, मिडफिल्ड र रक्षापंक्ति सबै क्षेत्रमा सन्तुलित देखिएको ब्राजिल बेल्जियमविरुद्ध पनि जित निकाल्नेमा ढुक्क छ । यी दुई टोलीबीच विश्वकपमा हालसम्म एक पटक मात्र सन् २००२ को प्रिक्वार्टरफाइनल चरणमा भेट भएको छ । त्यतिबेला रिभाल्डो र रोनाल्डोले एक÷एक गोल गरेपछि ब्राजिल विजयी बनेको थियो ।
बेल्जियमविरुद्धको खेलअघि ब्राजिललाई आफ्नो एउटा तथ्यले अझ हौस्याउने काम गरेको छ । ब्राजिल सन् १९९४ मा अमेरिकामा भएको विश्वकपपछि प्रत्येक संस्करणमा कम्तीमा क्वार्टरफाइनलसम्म पुगेको छ । त्यसमध्ये सन् १९९४ र सन् २००२ मा उसले उपाधि नै जितेको थियो भने सन् १९९८ मा उपविजेता बनेको थियो । जितको यही लयलाई कायम राखे ब्राजिल विश्वकपको छैटौं उपाधि जित्ने आफ्नो योजना पुरा गर्न सफल हुनेछ ।
विगतमा यी दुई टोली
कुल खेल: ४
ब्राजिल विजयी: ३
बेल्जियम विजयी: १
बराबरी: ०
प्रतिक्रिया दिनुहोस !
