मस्को : विश्व फुटबल महासंघ (फिफा)ले जारी विश्वकप फुटबलमा क्वार्टरफाइनल खेल खेलाउने रेफ्रीहरूको टुंगो लगाएको छ । क्वार्टरफाइनल खेल शुक्रबार र शनिबार खेलाइने छ । फिफाले चारवटा क्वार्टरफाइनल खेल खेलाउने जिम्मेवारी दक्षिण अमेरिकी र युरोपेली राष्ट्रका रेफ्रीलाई सुम्पिएको छ । जारी विश्वकपको शुक्रबार हुने पहिलो क्वार्टरफाइनलमा फ्रान्सले उरुग्वेको सामना गर्दैछ ।
निझ्नी नोभगोरोद रंगशालामा खेलाइने दुई पूर्वविजेता फ्रान्स र उरुग्वेबीचको उक्त खेल अर्जेन्टिनी रेफ्री नेस्टर पिटानाले खेलाउने फिफाले जनाएको छ । पिटानाले यसअघि जारी विश्वकपमा तीनवटा खेल खेलाइसकेका छन् । आयोजक रुस र एसियाली टोली साउदी अरेबियाबीच भएको प्रतियोगिताको उद्घाटन खेल पनि उनले नै खेलाएका थिए । रेफ्री पिटानाको राष्ट्र अर्जेन्टिना भने प्रिक्वार्टरफाइनल खेलमा फ्रान्ससँगै पराजित भएर उपाधि होडबाट बाहिरिएको थियो ।
यसैगरी शुक्रबार नै कजानमा ब्राजिल र बेल्जियमबीच अर्को क्वार्टरफाइनल खेल हुँदै छ । उक्त खेल भने सर्वियन रेफ्री मिलोराड माजिचले खेलाउने भएका छन् । गत मेमा भएको युरोपियन च्याम्पियन्स लिगको फाइनल खेल पनि उनले नै खेलाएका थिए । रेफ्री माजिचको राष्ट्र सर्विया भने जारी विश्वकपको समूहगत चरणबाटै बाहिरिएको थियो । दक्षिण अमेरिकी टोली ब्राजिल सर्वाधिक पाँच पटकको उपाधि विजेता हो ।
यसैगरी शनिबार सोचीमा हुने आयोजक रुस र क्रोएसिया बीचको खेल ब्राजिलियन रेफ्री स्यान्ड्रो रिस्सीले खेलाउने भएका छन् । उनले जारी विश्वकपमा यसअघि एक खेल खेलाएका थिए । समूहगत चरणमा क्रोएसिया र नाइजेरिया बीचको खेल उनले खेलाएका थिए । उक्त खेलमा क्रोएसिया २–० गोलले विजयी भएको थियो । अन्तिम क्वार्टरफाइनल खेल शनिबार नै स्विडेन र इङ्ल्यान्डबीच सामरामा खेलिने छ । उक्त खेलमा नेदरल्यान्ड्सका बोर्न क्विपर्सले रेफ्रीको भूमिका निर्वाह गर्नेछन् । इङ्ल्यान्ड सन् १९६६ को विश्वकप विजेता टोली हो ।
प्रतिक्रिया दिनुहोस !
