मस्को : जारी विश्वकप फुटबलमा यतिबेला उरुग्वे चर्चाको शिखरमा छ । क्वार्टरफाइनल चरणमा पुगिसकेको उरुग्वेको सफलतामा अनुभवी खेलाडी लुइस स्वारेजको भूमिका महŒवपूर्ण रहेको छ । आफ्नो उटपट्याङ व्यवहारका कारण सधैं चर्चामा रहने स्वारेज यतिबेला भने शान्त र भद्र देखिएका छन् । राष्ट्रिय टोलीबाट उनको प्रदर्शनमात्र होइन, व्यवहारमा पनि व्यापक सुधार आएको छ ।
उमेरले पनि पाको बन्दै गएका ३१ वर्षीय स्वारेजको बानीमा अहिले नसोचेको परिवर्तन आएको छ । स्वारेजले आफ्नो पुरानो बानीलाई चटक्कै छाडेका छन् । उनी सन् २०१० मा विपक्षीले प्रहार गरेको बललाई जानाजान हातले छेकेर चर्चाका आएका थिए । त्यतिबेला उनको निकै आलोचना भएको थियो । सन् २०१४ को ब्राजिल विश्वकपमा पनि उनी विपक्षी खेलाडीको काँधमा टोकेर लज्जित बनेका थिए ।
खेल मैदानमै कुनै न कुनै बदमासी गर्न माहिर स्वारेज यो विश्वकपका भने भलादमी देखिएका छन् । जारी विश्वकपमा भने उनी हाई बललाई हत्तपत्त टाउकोले हान्दै गोलमा परिणत गराउने प्रयासमा व्यस्त देखिएका छन् । रुसमा उनी बढीभन्दा बढी समय बलमाथि खुट्टा र टाउको प्रहार गर्दै टोलीलाई उपाधितर्फ लम्काउने ध्याउन्नमा छन् । स्वारेजको उक्त कलालाई देखेर अन्तर्राष्ट्रिय समाचार संस्था एपीले ‘पहिला हात, त्यसपछि दाँत र अहिले टाउको’ शीर्षकमा समाचारसमेत प्रकाशन गरेको छ ।
रुस विश्वकपमा स्वारेजको भलादमीपन देखेर आफू चकित परेको उनका साथी लियोनल मेसीले समेत खुलासा गरेका छन् । ‘स्वारेज वास्तवमा त्यस्ता थिएनन् । यो विश्वकपका उनले धेरै अनुशासित र संयमित खेल खेलिरहेका छन् । उनैको उत्कृष्ट खेलमा उरुग्वेले अगाडिको बाटो तय गरिरहेको छ । उनी अनुभवी र सक्षम खेलाडी हुन् । स्वारेजको वास्तविक क्षमताले फ्रान्सलाई अप्ठ्यारो पार्न सक्छ,’ बार्सिलोनामा स्वारेजसँगै व्यावसायिक फुटबल खेल्ने अर्जेन्टिनी स्टार मेसी भन्छन् । मेसीको टोली अर्जेन्टिना भने प्रिक्वार्टरफाइनलमै पराजित भइसकेको छ ।
स्वारेजको बानीलाई लिएर सधंै सञ्चारकर्मीले समेत अनौठा प्रश्न तेस्र्याउने गर्छन् । हरेक ठूला खेलअघि उनले आफ्नो बानीका विषयमा सञ्चारकर्मीलाई स्पष्टीकरण दिइरहनु परेको छ । दक्षिण अफ्रिकामा भएको सन् २०१० को विश्वकपमा घानाको प्रहारलाई स्वारेजले टाउको चलाए जस्तो गरी चमत्कारी रूपमा हातले छेकेका थिए । स्वारेजले त्यतिबेला देखादेख ठगी गरेको भन्दै उनको आलोचना भएको थियो ।
यसैगरी सन् २०१४ को विश्वकपमा स्वारेज इटालीका रक्षक जर्जियो चिलिनीलाई काँधमा टोकेर आलोचित बनेका थिए । त्यतिबेला स्वारेजलाई विश्व फुटबल महासंघ (फिफा) ले नौ खेल र चार महिनाको प्रतिबन्धसमेत लगाएको थियो । उनले विपक्षी खेलाडीलाई टोकेको त्यो तेस्रो पटक थियो । पछिल्लो समय स्वारेजलाई सुधार्न प्रशिक्षक ओस्कर टाबरेजले पनि निकै मेहनत गरेका छन् । स्वारेज आफैं पनि प्रशिक्षकले आफूलाई निकै सहयोग गरेको बताउँछन् । स्वारेजले आफू टोलीका युवा खेलाडीका लागि प्रेरणाको स्रोत भएकाले आफूले कमजोरी गरे युवा खेलाडीको मनोबल गिर्ने धारणा पनि व्यक्त गरे । ‘सिनियरले गल्ती गर्दा जुनियरलाई गाह्रो हुन्छ । अप्ठ्यारो अवस्थामा समेत नेतृत्व लिनुपर्ने भएकाले अहिले गल्ती गर्न मनाही छ,’ स्वारेज भन्छन् ।
प्रतिक्रिया दिनुहोस !
