ओखलढुंगा : ओखलढुंगा पहिरोको उच्च जोखिममा रहेको पाइएको छ । एक सर्भेक्षणअनुसार ओखलढुंगामा साना ठूला गरी एक सय ४६ पहिरोले बस्ती जोखिममा पारेका छन् ।
जिल्ला भू–संरक्षण कार्यालय ओखलढुंगाले गरेको सर्वेक्षणमा साना ठूला गरेर एक सय ४६ पहिरोका कारण जिल्लाभर पहिरोको जोखिम छ । ७२ सालको भूकम्पपछि जिल्लाका एक दर्जन स्थानमा पहिरो गएको छ ।
उक्त पहिरोका कारण केही बस्ती नै विस्थापित छन् । पहिरो गएका एक सय ४६ स्थानलाई उच्च जोखिमयुक्त किटानसमेत गरिएको छ ।
ओखलढुंगाको धेरै पश्चिमी भू–भाग र सदरमुकामसमेत रहेको सिद्धिचरण नगरपालिकाका केही क्षेत्र बढी जोखिममा रहेको भूसंरक्षण अधिकृत गंगाराम साहुले बताए । नगरपालिकाभित्र रहेका वर्णालु, विगुटार र सल्लेरी बाढी पहिरोको जोखिममा छन् ।
लिखु गाउँपालिकाका गाम्नाङटार, पोकली, खिजीदेम्बाको रगनी, खिजीचण्डेश्वरी पहिरोको बढी जोखिममा छन्’, जिल्ला भूसंरक्षण अधिकृत साहुले थपे, ‘यी क्षेत्रमा बग्ने लिखु नदी, खिजी र पोकली खोलाले जोखिम निम्त्याउन सक्छन् ।’
कमजोर भूसंरचना, भिरालो जमिन, नाङ्गा पहाड, जथाभावी खनिएका सडकका कारण जिल्लाभर बाढी पहिरोको उच्च जोखिम छ । कतिपय स्थानमा पहिरोको कारण बस्ती नै स्थानान्तरण गर्नुपर्ने अवस्था आएको छ ।
पहिरोले चिसुंगढीको माम्खा र सिद्धिचरण नगरपालिकाको बिगुटारमा पहिरोले बस्ती विस्थापित गरेको छ । पहिरोका कारण ठूलो मानवीय क्षति व्यहोर्नु नपरे पनि धेरै बस्ती बाढी पहिरोको जोखिममा छन् ।
अध्ययनअनुसार, हर्कपुर, प्राप्चा, रगनी, मूलखर्क, यसम, कालिका, विलन्दु, पोकली, खिजीफलाटे, खिजीचण्डेश्वरी, बाक्सा, च्यानम, फेदीगुठ लगायतका क्षेत्र पनि पहिरोको जोखिममा रहेको प्रतिवेदनमा उल्लेख छ ।
प्राकृतिक प्रकोपको जोखिम बढे पनि विपद् रोकथाम र न्यूनीकरणका लागि कार्यक्रम र बजेट भने स्थानीय सरकारले व्यवस्था गर्न सकेका छैनन् ।
प्रतिक्रिया दिनुहोस !
