बीबीसी : १६ दिनदेखि थाइल्याण्डको गुफामा फसेका बालबालिकाले आफ्ना अभिभावकलाई गुफाभित्रबाटै भावनात्मक चिठी पठाएका छन् । उनीहरुले अभिभावकलाई आफ्नो चिन्ता नगर्न आग्रह गरेका छन् ।
‘चिन्ता नगर्नु होस, हामी सबै ठिक छौ’, एक बालकले भावनात्मक रुपमा ठ्टटा गर्दै चिठीमा लेखेका छन्,‘ सर, हामीलाई धेरै गृहकार्य नदिनु होला है ।’ ती बालकले लेखेका छन् : अन्धकारभित्रबाट आमा, बुवा, दिदीलगायत सबैलाई माया, मेरोे चिन्ता नगर्नु होला , हामी सुरक्षित छौं ।
१६ दिनदेखि थाइल्याण्डको एक गुफामा फसेका १२ बालक र उनीहरुका फुटबल प्रशिक्षक उद्धार गर्न करिब चार महिना लाग्ने अनुमान गरिएको छ। जुन २३ तारिखबाट हराइरहेका उनीहरु नौ दिनपछि भेटिएका थिए । उनीहरुको जुलाई ७ तारिक हुँदासम्म उद्धारको कुनै सम्भावना निस्किएको छैन ।
गुफामा घुम्न गएका उनीहरुलाई बाढी पसेपछि भित्रै थुनेको हो । १२ बालबालिका र प्रशिक्षकलाई खाना र अक्सिजनको व्यवस्था गरिएको छ । उद्धारकर्मीले विभिन्न उपाय अपनाए पनि उनीहरुको तत्काल उद्धार हुने सम्भावना नभएको बीबीसीले जनाएको छ । उनीहरुको उद्धारक लागि गुफामा जमेको पानी सुक्नुपर्छ त्यसका लागि कम्तिमा अझै चार महिना लाग्छ ।
उद्धारमा खटिएका एकजना गोताखोरको मृत्यु भएपछि उनीहरुको उद्धार झन कठिन बनेको छ । फसेका बालकलाई खाना पुर्याएर बाहिर फर्किने क्रममा अक्सिजनको अभावका कारण एक गोताखोरको मृत्यु भएको हो ।उनको मृत्युपछि त्यहाँ पुग्न अक्सिजनको अभाव नहोस् भनेर विभिन्न उपाय अपनाइएको छ ।
उद्धारकार्यमा खटेका एकजना अधिकारीलाई उद्धृत गर्दै समाचारमा उल्लेख भए अनुसार उक्त गुफाको बाहिरबाट भित्र पुग्नेगरी करिब १०० स्थानमा प्वाल पारेर गुफा भित्रको ग्याँस बाहिर फाल्ने र अक्सिजन भित्र पठाउने ‘चिम्नी’ बनाउने काम सुरु भएको छ। त्यसरी बाहिरबाट पारिएका प्वाल करिब तीन सय मिटर लामा छन्।
प्वालबाट अक्सिजन भित्र पठाउन सकिने र त्यसैबाट गुफाभित्रको ग्यास पनि बाहिर आउने भएकोले उद्धारकर्ता सजिलै गुफाभित्र जान सक्ने र ती बालकको उद्धार गर्न सजिलो पर्ने उनीहरुले बताएका छन् ।
यस्तो विधि अपनाउँदा भित्र छिर्न पनि सजिलो पर्ने र गोताखोरले सामान्य सावधानीका साथ भित्र गएर उनीहरुको उद्धार गर्न सक्ने अनुमान छ ।
ठूलो सङ्ख्याका उद्धारकर्मी तथा सेनाले दुई दिन लगाएर विशेष प्रविधिको प्रयोगगरी यी चिम्नी निर्माण गरिरहेका समाचारमा जनाइएको छ ।
समाचारमा उल्लेख भए अनुसार अहिलेसम्म १२ बालक र एक प्रशिक्षकको स्वास्थ्य अवस्था भने सामान्य रहेको छ ।
प्रतिक्रिया दिनुहोस !
