९६आैं अन्तर्राष्ट्रिय सहकारी दिवस : भूमि खण्डीकरण मुख्य समस्या
असार २४, २०७५ आइतबार ६:४६:०
काठमाडौैं : कृषि, भूमि व्यवस्था तथा सहकारीमन्त्री चक्रपाणी खनालले एकीकृत कृषि खेती प्रणालीमार्फत उत्पादन, सामाजिक परिचालन र बजारीकरणमा सहकारीले योगदान दिनुपर्ने बताए । उनले नेपालको अधिकांश भूमि खण्डीकरण भएकाले कृषि उत्पादनमा चुनौती रहेको उल्लेख गरे ।
९६औं अन्तर्राष्ट्रिय सहकारी दिवसका अवसरमा मन्त्री खनालले जमिन खण्डीकरणले कृषिमा आमुल परिवर्तन हुन नसकेको जिकिर गरे । कृषि भूमि व्यवस्था तथा सहकारी मन्त्रालय, राष्ट्रिय सहकारी महासंघ र संयुक्त राष्ट्र संघीय विकास कार्यक्रमको संयुक्त आयोजनामा सहकार्यमार्फत दीगो समाज भन्ने मुल नाराका साथ नेपालमा पनि अन्तर्राष्ट्रिय सहकारी दिवस मनाइएको हो ।
पूर्वउपप्रधानमन्त्री भरतमोहन अधिकारीले समृद्ध मुलुक निर्माणका लागि सहकारीले उत्पादनमा जोड दिनुपर्ने बताए । उनले दिगो विकास लक्ष्य प्राप्तिमा सरकार र निजी क्षेत्र र सहकारीको पनि जिम्मेवारी रहेको बताए । राष्ट्रिय सहकारी महासंघका अध्यक्ष केशव बडालले सहकारीले हात झिकेको खण्डमा दिगो विकासका लक्ष्य हासिल गर्न नसकिने बताए । उनले जल, थल र आकासको संरक्षणमा देशभरिका सहकारीकर्मी लाग्नुपर्नेमा जोड दिए ।
संयुक्त राष्ट्र संघीय विकास कार्यक्रमका कन्ट्री डाइरेक्टर रेनाउड मेयरले नेपालको सहकारी अभियान जनसम्पर्क गर्ने उत्कृष्ट मञ्च बन्न सफल भएको बताए । उनले नयाँ संविधानले सहकारीलाई स्वीकार गरेको अवस्थामा दीगो विकास लक्ष्य हासिल गर्न महत्वपूर्ण भूमिका खेल्ने बताए ।
राष्ट्रिय योजना आयोगका उपाध्यक्ष पुष्पराज कँडेलले दीगो विकास लक्ष्य हासिल गर्न सहकारीको अनिवार्य सहभागिता गराइएको बताए । यी लक्ष्य हासिल गर्न आयोगले सहकारीसँग सहकार्य गर्ने उनले बताए ।
चितवन बचत संघ उत्कृष्ट
यसैबीच राष्ट्रिय सहकारी महासंघले जिल्ला बचत तथा ऋण सहकारी संघ लि. चितवनलाई यस वर्षको उत्कृष्ट सहकारी घोषण गरेको छ । महासंघले देशभरिका ३२१ सहकारीबाट चितवनको बचत तथा ऋण सहकारी संघलाई उत्कृष्ट घोषणा गरेको हो ।
सोही अवसरमा पत्येक प्रदेशका एक÷एक सहकारीलाई उत्कृष्ट सहकारी घोषणा गरी पुरस्कार प्रदान गरिएको थियो । उत्कृष्ट सहकारीलाई मन्त्री खनालले प्रमाणपत्र प्रदान गरेका थिए । सोही अवसरमा एक केन्द्रीय संघसहित विभिन्न १० जिल्लास्तरीय सहकारी संघलाई कप्युटरसमेत प्रदान गरिएको थियो ।
प्रतिक्रिया दिनुहोस !
