काठमाडौं : गजलकार आस्था केसीको गजल कृति ‘उज्यालोको खोजी’ तथा प्रदीप थापाको रुवाई, गीत, गजलकृति ‘प्रयास’ र एल्बम ‘प्रयास’ विमोचन गरिएको छ ।
राजधानीमा शनिबार भएको कार्यक्रममा अन्तर्राष्ट्रिय नेपाली गजल मञ्चको आयोजनामा भएको कार्यक्रममा गजलकार ललिजन रावलले गजल तथा साहित्यले समाजलाई परिर्वतनमा अहं भूमिका खेल्ने बताए ।
रावलले अन्य साहित्य जस्तै गजलको रचना र संरचना प्रक्रियालाई समय क्रमसँगै स्रष्टाहरूले आफूअनुकूल व्याख्या गर्ने गरेको र रचना गरेको बताए । नेपाली साहित्यकारले नेपाली शब्द हुँदाहुँदै विदेशी शब्द प्रयोग गरेकोप्रति उनले कडा टिप्पणी गरे ।
‘प्रयास’ का स्रष्टा थापाले आफू लेखन विधामा एकदम कलिलो भएको र लेखनमा निरन्तर लागिरहने बताए । गजलकार आस्थाले आफू १५–१६ वर्षको किशोरी अवस्थामा जनयुद्धमा लागेको र त्यही समयबाटै गीत, कविता, गजल पढ्न र लेख्न थालेको बताइन् । हिजोको जनयुद्धकालीन यात्राले साहित्यमा लाग्नसमेत प्रेरित गरेको उनको भनाई छ ।
विमोचित पुस्तक तथा एल्बममाथि प्रभाती किरण, ज्ञानु विद्रोही, शैलेन्द्र अधिकारीले टिप्पणी गरेका थिए भने साहित्यकारहरू डा. भोजराज घिमिरे, नरेन्द्रजंग पिटर, घनेन्द्र ओझा, बाबु त्रिपाठी, राधा कणेललगायतले लेखकद्वयलाई शुभकामना दिएका थिए ।
प्रतिक्रिया दिनुहोस !
