कर्णालीमा बिप्लवको बन्द, प्रहरी स्कर्टिङमा सवारी सुचारु

कालिकोटः नेत्रविक्रम चन्द विप्लव नेतृत्वको नेपाल कम्युनिस्ट पार्टीले आह्वान गरेको कर्णाली बन्दका क्रममा प्रहरीले स्कर्टिङ गरेर सवारी साधन सुचारु गराएको छ । 

कर्णाली राजमार्ग अन्तर्गत जुम्ला–सुर्खेत राजमार्गमा नेकपाको बन्दका कारण प्रहरी स्कर्टिङा गाडी चलाइएको हो । गत शुक्रबार मुगुमा भएको नेकपाको कार्यक्रममा प्रहरीले गोली चलाएको विरोधमा कर्णाली बन्द आह्वान गरिएको थियो । 

बन्दको समयमा सवारी साधन तथा यात्रुको सुरक्षालाई मध्यनजर गरी प्रहरीले स्कर्टिङमा कर्णाली राजमार्गमा यातायात सञ्चालन गरेको जिल्ला प्रहरी कार्यालय कालिकोटका प्रमूख सुबासचन्द्र बोहोराले जानकारी दिए । 

‘सोमबारको बन्दले कर्णाली राजमार्ग अबरुद्ध भएन । यात्रुको समस्यालाई मध्यनजर गरी प्रहरीले स्र्कटिङ गरेर यातायात सेवा सञ्चालन भएको छ’, उनले भने । सोमबार दिउँसो प्रहरीले सुर्खेत–नेपालगञ्जबाट कालिकोट–जुम्लाका लागि आएका करिब १५ वटा गाडी दैलेखको सिमाना दैखोलादेखि जुम्लाको सिमाना नाग्मा बजारसम्म र नाग्माबाट करिब १२ वटा गाडी दैलेखको सिमाना दैखोलासम्म स्र्कटिङ गरी पुगाएको छ । 

नेकपाका जिल्ला सेक्रेटरी मनीलाल ऐडी रणदीपले मुगुमा नेकपाको सांस्कृतिक कार्यक्रममा भएको हस्तक्षेपको विरोध तथा गिरफ्तार नेता कार्यकर्तालाई तत्काल रिहा गराउन बन्द गरिएको बताए । 

उनले गिरफ्तार कार्यकर्ता रिहा नगरे कडा आन्दोलन गर्ने बताएका छन् । उनका अनुसार मुगुकै घटनाको बिरोधमा सोमबार कर्णाली बन्द आह्वान गरिएको हो । कर्णाली करिडोरमा यातायात अवरुद्ध हुनुका साथै स्थानीय तहको काम पनि प्रभावित भएको बताए ।