मस्को : जारी विश्वकपमा अविश्वासिलो प्रदर्शन गर्दै क्रोएसिया सेमिफाइनलमा पुगिसकेको छ । समूहगत चरणको तीनवटै खेलमा जित हात पार्दै विजेता बनेको क्रोएसियाले प्रिक्वार्टरफाइनलमा डेनमार्कलाई र क्वार्टरफाइनलमा आयोजक रुसलाई हराएर आफ्नो क्षमताको परिचय दिइसकेको छ । क्रोएसियाले सेमिफाइनलमा भने बुधबार सन् १९६६ को विश्वकप विजेता इङ्ल्यान्डको सामना गर्दैछ ।
तर, यतिबेला सेमिफाइनल खेलको अन्तिम तयारीमा व्यस्त क्रोएसिया आफ्ना खेलाडीको व्यवहारका कारण आलोचित बनेको छ । खेलाडीले अनुशासन मिचेर खेलमा राजनीतिलाई मिसाउन खोजेपछि यतिबेला सामाजिक सञ्जालहरूमा समर्थकदेखि लिएर खेल पदाधिकारीसम्मले क्रोएसियाको आलोचना गरेका छन् । रुसविरुद्घको खेलमा जित हात पारेपछि क्रोएसियन टोलीका डिफेन्डर डोमागोज भिडाले ‘यो जित युक्रेनको गौरवका लागि’ भन्ने अभिव्यक्ति दिएका थिए ।
डिफेन्डर भिडाको उक्त अभिव्यक्तिसहितको भिडियो नै अहिले आलोचनाको विषय बनेको हो । विश्व फुटबल महासंघ (फिफा) ले पनि भिडाले खेलमा राजनीतिक विषयलाई प्रवेश गराएर अनुशासन उल्लंघन गरेको जनाउँदै क्रोएसियन फुटबल संघ र भिडालाई चेतावनी दिएको छ । भिडाले रुसविरुद्घको खेलमा गोलसमेत गरेका थिए । भिडाभन्दा अघि क्रोएसियाका पूर्वखेलाडी ओग्जेन भुकोजेभिचले पनि रुसविरुद्घको जित ‘डाइनामो र युक्रेनका लागि’ भन्ने अभिव्यक्ति दिएका थिए ।
खेल चलिरहेको बेला भुकोजेभिचले ‘यो जित डाइनामो र युक्रेनका लागि ...अघि बढ क्रोएसिया’ भन्दै खेलाडीलाई हौंस्याएका थिए । यस्तो अभिव्यक्तिसहितको भिडियो सार्वजनिक भएपछि थुप्रै रुसी नागरिकले खेलमा राजनीतिक विषयलाई प्रवेश गराउन खोजिएको भन्दै सामाजिक सञ्जालहरूमार्फत आपत्ति जनाएका थिए । भिडा र भुकोजेभिच दुवैजना युक्रेनी क्लब डाइनामो किभबाट व्यावसायिक फुटबल खेल्छन् ।
रुसविरुद्घको क्वार्टरफाइनल खेलको अतिरिक्त समय (१०१औं मिनेट) मा गोल गरेका भिडाले पेनाल्टी सुटआउटमा पनि गोल गरेका थिए । पेनाल्टी सुटआउटमा क्रोएसियाले रुसलाई ४-३ गोलले हराएको थियो । ‘खेलाडीले अनुशासन उल्लंघन गरेको विषयलाई लिएर फिफाको अनुशासन समितिले क्रोएसियन फुटबल संघ र भिडालाई चेतावनीसहितको पत्र पठाइसकेको छ’, फिफाले भनेको छ।
भिडाले भने फुटबललाई राजनीतिसँग जोड्ने आफ्नो कुनै उद्देश्य नरहेको दाबी गरेका छन् । ‘मैले फुटबलमा राजनीति मिसाउन खोजेको होइन । मैले डाइनामो किभका साथीहरूसँग सामान्य ठट्टामात्र गर्न खोजेको हुँ’, भिडाले एक रुसी पत्रिकासँगको कुराकानीमा भनेका छन्, ‘म रुसी नागरिकलाई माया गर्छु र म युक्रेनी नागरिकलाई पनि माया गर्छु ।’
प्रतिक्रिया दिनुहोस !
