धनगढी : प्रदेश ७ को अस्थायी राजधानी तोकिएपछि धनगढीमा निजी लगानीका सुविधा सम्पन्न अस्पताल खुल्न थालेका छन् । प्रदेशभरिको रेफरल अस्पताल सेती अञ्चल अस्पतालको स्तरोन्नति हुने छाँटकाँट नदेखिएपछि निजी लगानीकर्ताले अस्पतालमा सम्भावना देखेका हुन् ।
धनगढीको हसनपुरमा २५ शैड्ढयाको निसर्ग मल्टिस्पेसियालिटी अस्पताल सञ्चालनमा आएको छ । पाँच करोडको लगानीमा सञ्चालनमा आएको अस्पतालमा सघन उपचार कक्ष (आईसीयू), नवजात सिसु सघन उपचार कक्ष (एनआईसीयू), बाल सघन उपचार कक्ष (पीआईसीयू), कृत्रिम स्वासप्रस्वास प्रणाली (भेन्टिलेटर) सहितका सेवा रहेको अस्पतालले जनाएको छ ।
‘आधुनिक शल्यक्रिया कक्ष, उच्चतम प्रविधिसहित प्रयोगशाला, हाडजोर्नी विभाग, दुरबिन प्रविधिबाट सर्जरी, जनरल सर्जरी, बालरोगसहित विशेषज्ञ सेवा सञ्चालनमा आएको अस्पतालका अध्यक्ष तीर्थराज पन्तले जानकारी दिए ।
धनगढीकै चटकपुरमा अर्को सुविधा सम्पन्न माया मेट्रो अस्पताल पनि सञ्चालनको तयारीमा छ । उसले उपकरण जडानको काम गरिरहेको छ भने जनशक्ति भर्नाका लागि आवेदन आह्वान गरेको छ ।
बिरामीका लागि वातानुकुलित क्याबिनसहित सुविधा सम्पन्न अस्पतालमा १० करोडको लगानी भइरहेको अस्पतालका अध्यक्ष धिरेन्द्र साउदले बताए । माया मेट्रो अस्पतालमा पनि आईसीयू, एनआईसीयू सेवा उपलब्ध हुनेछ ।
‘प्रदेशको राजधानीमा सरकारी अस्पतालको सेवा प्रभावकारी छैन, धेरै नेपाली भारतका सीमा क्षेत्रमा गइरहेका छन्, यस्ता अस्पतालले भारत जाने बिरामीलाई रोक्नेछ’, अध्यक्ष साउदले भने ।
उनले अस्पतालले इन्डोस्कोपी, कोलोनोस्कोपी, क्यान्सर स्क्रिनिङ र सिटी स्क्यानलगायत सेवा दिने योजना अस्पतालको छ । नेपालका विभिन्न मेडिकल कलेज र अस्पतालमा लामो समयदेखि काम गर्दै आएका अनुभवी तथा विशेषज्ञ चिकित्सकले व्यवसायीसँगको सहकार्यमा अस्पताल सञ्चालनमा ल्याउने तयारी गरेका हुन् ।
निकट भविष्यमै सञ्चालन हुने गेटा मेडिकल कलेजमा लगानीको वातावरण बनेको सञ्चालकहरूले बताएका छन् । २०७६ सालबाट एमबीबीएस पढाई हुने गरी कैलालीको गेटामा सरकारी लगानीको मेडिकल कलेज निर्माण भइरहेको छ । कलेज भवन र अस्पताल भवनको ४० प्रतिशत निर्माण सम्पन्न भइसकेकाले निजी लगानीकर्ताले स्वास्थ्य क्षेत्रमा धनगढीमा भविष्य देखेका हुन् ।
बिरामीको चाप र अनुसन्धानको अवसर धेरै भएकाले स्वास्थ्य सेवा दिन चिकित्सक आउन थालेको हसनुरस्थित निसर्ग अस्पतालका सञ्चालकमध्येका कुवेरबहादुर शाहीले बताए । ‘सेतीअञ्चल अस्पतालमा प्रदेश ७ का ९ वटै जिल्लाका बिरामी आउँछन्, तर अस्पताल पुग्नेवित्तिकै रेफर हुन्छन्, त्यस मध्येका धेरैजना नजिक पर्ने भएकाले भारतको लखनउ, बरेली, पिलिभीततिर जान बाध्य छन्’ शाहीले भने ।
दुई महिनाअघि निजी क्षेत्रबाट डाइलाइसिस सेवा दिने गरी अस्पताल लाइनमा नोभा अस्पताल सञ्चालनमा आएको थियो । अस्पतालमा पेट, छाती, मुटु, हाडजोर्नी, नाक, कानलगायतको स्वास्थ्यउपचार सेवा दिने गरी दुई करोडको लगानी गरिएको छ । १५ शैयाको अस्पतालले डायलाइसिसलाई बढी प्राथमिकता दिने अस्पतालकी सञ्चालक अनिता पन्तले बताइन् ।
यसअघि धनगढीमा निजी क्षेत्रको सिपी अस्पताल, कैलाली अस्पताल, नवबुद्ध अस्पतालमाझ नोभा अस्पताल र पद्मा अस्पतालले सेवा दिँदै आएका छन् । तर अहिले खुलेका अस्पतालले विषेशज्ञ सेवा दिने बताएका छन् ।
सरकारी लगानीको सेतीअञ्चल अस्पतालमा २०४० मै तोकिएका दरबन्दीमा पनि १३ जनाचिकित्सकहरूको दरबन्दी खाली छ । मुटुरोग विषेषज्ञको त ढाई वर्षदेखि दरबन्दीका डाक्टर नै आएका छैनन् । जनसंख्याका हिसाबले प्रदेश ७ का नौ जिल्लामध्ये आधाभन्दा बढी जनसंख्या कैलाली र कञ्चनपुरमा बसोबास गर्ने भएकाले पनि निजी अस्पतालका लगानीकर्ताले सम्भावना देखेका हुन् । पछिल्लो जनगणनाअनुसार २५ लाखमध्ये झन्डै १३ लाख जनसंख्या तराईका दुई जिल्ला कैलाली र कञ्चनपुरमा मात्रै रहेकाले धनगढीमा स्वास्थ्य उपचारको सम्भावना बढी देखिएको हो ।
अहिलेसम्म धनगढीमा सरकारी र निजी लगानीको एनआईसीयु र पीआईसीयू छैन । ट्रमा सेन्टर नभएकाले पनि दुर्घटनाका घाइतेलाई भारतको लखनउ वा हल्द्वानी लैजाने गरिएको छ ।
क्याप्सन ः शनिबारदेखि सञ्चालनमा आएको निसर्ग अस्पताल र सञ्चालनको तयारीमा रहेको माया मेट्रो अस्पताल ।
प्रतिक्रिया दिनुहोस !
