मस्को : जारी विश्वकपमा क्रोएसियाले बुधबार राति पूर्वविजेता इङ्ल्यान्डको सामना गर्दैछ । लुजनिकी स्टेडियममा हुने सेमिफाइनलअघि क्रोएसियाली टोली दबाबमा परेको छ । क्रोएसियाका डिफेन्डर सिमे वार्सल्कोले सेमिफाइनल खेल्न नसक्ने भएका छन् । रुसविरुद्धको क्वार्टरफाइनल खेलमा घुँडामा चोट बोकेका सिमेको चोट गम्भीर रहेकाले सेमिफाइनल खेल गुमाउने समाचारमा जनाइएको छ ।
क्रोएसियाका लागि ३९ खेल खेलिसकेका सिमे क्वार्टरफाइनलमा घुँडामा चोट बोक्दै ९७औं मिनेटमा मैदानबाट बाहिरिएका थिए । विश्वकपको सबै खेल खेलेका सिमेको स्थानमा प्रशिक्षक ज्लाटको डालिचले भेट्रान डिफेन्डर भेड्रान कोर्लुकालाई खेलाउन सक्ने जनाइएको छ । कोर्लुका सेन्टर ब्याक भएकाले सिमेको भूमिकामा भने प्रशिक्षक डालिचले डोमागोज भिदालाई उतार्ने सम्भावना रहेको छ ।
एट्लेटिको म्याड्रिडका डिफेन्डर सिमे पूर्ण रूपमा ठीक हुन कम्तीमा एक महिना लाग्ने भएकाले उनले क्रोएसिया फाइनल पुगेमा त्यो खेल पनि गुमाउन सक्ने प्रशिक्षक डालिचले बताए । सिमेले आफू विश्वकपबाट बाहिरिए पनि टोलीले आगामी खेलमा उत्कृष्ट प्रदर्शन गर्ने विश्वास व्यक्त गरे । ‘सेमिफाइनलअघि पक्कै पनि हामी दबाबमा छौं । हामीले इङ्ल्यान्डका हरेक खेल नियालिरहेका छौं । इङ्ल्यान्ड अहिले उत्कृष्ट लयमा छ । युवा टोलीमाथि कुनै पनि दबाब छ जस्तो मलाई लाग्दैन’, सिमेले भनेका छन् ‘तर, क्रोएसियाले पनि राम्रो फुटबल खेलेको छ । इङ्लिस खेलाडीलाई कसरी रोक्ने भन्ने सूत्र प्रशिक्षक डालिचसँग छ ।’
क्रोएसियाले प्रिक्वार्टरफाइनल र क्वार्टरफाइनल खेल पेनाल्टी सुटआउटमा जितेको थियो । डेनमार्कसँगको प्रिक्वार्टरफाइनल खेल निर्धारित ९० मिनेट र त्यसपछि थपिएको ३० मिनेटको खेलमा १–१ गोलको बराबरी खेल्दै पेनाल्टीमा ३–२ ले विजयी भएको थियो । यसैगरी क्वार्टरफाइनलमा पनि आयोजक रुससँग निर्धारित र त्यसपछि थपिएको समयमा २–२ गोलको बराबरी खेल्दै पेनाल्टीमा ४–३ ले विजयी भएको थियो ।
प्रतिक्रिया दिनुहोस !
