ललितपुर : जावलाखेलस्थित सदर चिडियाखानाले सूर्यविनायकमा विस्तार गर्ने तयारी थालेको छ । अहिले जावलाखेलको सानो क्षेत्रफलमा रहेको चिडियाखाना सूर्यविनायकको ठूलो क्षेत्रफलमा पनि फैलने सदर चिडियाखानाले जनाएको छ ।
सदर चिडियाखानाका प्रमुख चिरञ्जीवी पोखरेलले सूर्यविनायकको जंगलमा प्राणी उद्यान केन्द्रका रूपमा चिडियाखानाको विस्तार गरिने जानकारी दिए । जावलाखेलमा भन्दा सूर्यविनायकको जग्गाको क्षेत्रफल बढी छ । जावलाखेलको चिडियाखाना ६ हेक्टरमा छ भने सूर्यविनायकमा १४ दशमलव २९ हेक्टरमा क्षेत्रफलमा वन्यजन्तुलाई राखिनेछ । उनले भने, ‘यहाँ वन्यजन्तुलाई खोरमा राख्नु परेको छ तर सूर्यविनायकमा ठूलो क्षेत्रफलमा खुला राखिनेछ ।’
क्षेत्रफल ठूलो हुँदा ठूला जनावरलाई सहज हुने उनी बताउँछन् । यहाँ सानो क्षेत्रफलमा व्यवस्थापन गरेर जनावरलाई राखिएको छ । उनले भने, ‘हामीले प्राणी उद्यान केन्द्र अन्तर्राष्ट्रिय स्तरको बनाउन लागेका छौँ ।’ सूर्यविनायकमा अहिले विभिन्न किसिमका भौतिक पूर्वाधार निर्माणको काम भएको छ ।
सूर्यविनायकमा चिडियाखाना विस्तारको काममा प्राविधिक रुपमा प्रकृति संरक्षण कोषले गरिरहेको छ । कोषले झण्डै २२ वर्षपहिले देखि सदर चिडियाखानाको व्यवस्थापन गर्दै आएको छ । नेपाल सरकार र कोषका बीचमा ३० वर्षसम्म कोषले व्यवस्थापन गर्ने सम्झौता भएको थियो । चिडियाखानाको स्थापना १९८९ सालमा भएको थियो । चिडियाखानामा वार्षिक झण्डै ११ लाख आगन्तुक आइरहेका छन् । १२४ प्रजातिका ८३७ वटा जनावर यहाँ रहेका छन् ।
प्रतिक्रिया दिनुहोस !
