दार्चुला : दार्चुलामा बाढीपहिरोले बितण्डा मच्चाएको छ । गए राति परेको भारी वर्षाका कारण दार्चुलामा विभिन्न नदी खोलाहरूमा पानीको बहाव बढेर विभिन्न स्थानमा पहिरो तथा बाढीले क्षति गरेको छ । नौगाड गाउँपालिकामा बढी क्षति गरेको छ । नौगाड खोलामा पानीको बहाव बढेपछि नदीले जमिन कटान गरिरहेको छ भने आधा दर्जन घरहरूमा क्षति पुर्याएको छ । ती खोलाहरूमा लगाइएको काठेपुलहरू समेत बगाइदिएको छ ।
नौगाड गाउँपालिका वडा नम्बर ४ कपडेका लालमणि ठगुन्नाका दुई वटा घरमा पहिरोले क्षति पुर्याएको छ । नौगाड खोलामा आएको बाढीले होपरीगाडमा रहेको मनवीर ठगुन्नाको एउटा पसल बगाएको छ । नौगाड गाउँपालिका वडा नम्बर १ मा खड्कसिंह ठगुन्नाको घर पहिरोले पुरिँदा पशुचौपाया, अन्नबाली, अन्य सम्पत्ति पहिरोले पुरिएको मिडिया विकास समाज नेपाल दार्चुलाका सदस्य आनसिंह बडालले बताए ।
यस्तै नौगाड गाउँपालिका वडा नम्बर १ मा रहेको गोधानी खोला लघुजलविद्युत् आयोजनाको विद्युत्गृहमा क्षति भएको छ । गरिबी निवारण कोषको ६० लाख बढी लगानीमा उक्त जलविद्युत् आयोजना निर्माण गरिदिएको हो ।
विभिन्न खोलामा लगाइएका पुलहरू बगाएको छ । गोधानी खोला, सेइल खोला, दह खोलामा राखिएका काठेपुलहरू पनि बगाउँदा आवत्जावतसमेत बन्द भएको नौगाड गाउँपालिकाका अध्यक्ष प्रेमसिंह धामीले बताएका छन् । खोलाहरूमा लगाइएका पुलहरू बगाउँदा उद्धार कार्यसमेत प्रभावित भएको इलाका प्रहरी कार्यालय गोकुलेश्वर जनाएको छ ।
बस्तीहरू सञ्चारविहीन
नौगाडका बाढी तथा पहिरोले क्षति पुर्याएका ती बस्तीहरूमा सञ्चार सेवा नै अवरुद्ध भएको छ । घाम लागेका बेलामात्रै टेलिफोन सेवा उपलब्ध हुने र उक्त बस्तीहरूमा टेलिफोन सम्पर्क नहुँदा थप विवरणहरू संकलन गर्न समेत समस्या भइरहेको प्रहरीले जनाएको छ ।
इलाका प्रहरी कार्यालय गोकुलेश्वर, प्रहरी चौकी सिप्टी र प्रहरी चौकी दल्लेकबाट प्रहरी टोली उद्धारका लागि ती बस्तीमा परिचालन गरिएका छन । उद्धारका लागि खटिएको प्रहरी टोलीसँगसमेत सम्पर्क हुन नसकेको प्रहरी चौकी सिप्टीले जनाएको छ ।
महाकाली नदीभन्दा दोस्रो ठूलो नदी चमेलियामा पानीको बहाव खतराको लेबलमा पुगेको छ । पानीको बहाव साँझ र राति बढ्ने अनुमान गरिएकाले नदी किनारमा बसोबास गरिरहेका मानिसलाई सतर्कता अपनाउन जिल्ला प्रशासन कार्यालय दार्चुलाले अनुरोध गरेको छ ।
प्रतिक्रिया दिनुहोस !
