रुकुम पश्चिममा बस दुर्घटना, एकको मृत्यु, आठको अवस्था गम्भीर

रुकुम (पश्चिम) : रुकुम पश्चिमको सल्लेबाट मुसिकोट बजारतर्फ आउँदै गरेको ना ५ ख ६५१० नम्बरको बस दुर्घटना हुँदा १ जनाको घटना स्थलमै मृत्यु भएको छ । मृत्यु हुनेमा मुसिकोट नगरपालिका-१ की २५ वर्षीया सपना मल्ल भण्डारी रहेकी छन् । दुर्घटनामा १६ जना घाइते भएका छन् । 

जसमा ८ जना गम्भीर घाइते रहेको जिल्ला प्रहरी कार्यालय रुकुम पश्चिमका प्रमुख सुमित खड्काले जानकारी दिए । उनका अनुसार गम्भीर घाइते मुसिकोट नगरपालिका-१ की ८ वर्षीया बालिका नबीना थापालाई थप उपचारका लागि नेपालगन्ज रेफर गरिएको छ ।

अन्य घाइतेहरुलाई जिल्ला अस्पताल रुकुममा उपचारका लागि भर्ना गरिएको छ । दुर्घटनाबारे अनुसधान भइरहेको प्रहरीले जनाएको छ ।