बागलुङ : पहिरोबाट परिवारका ३ जना सदस्य गुमाएका बरेङ गाउँपालिका वडा नंं १ लुरुङका दुई किशोरीहरुलाई नेपाल कम्युनिष्ट पार्टी (नेकपा) बागलुङले आर्थिक सहयोग गरेको छ। असार ११ गते राति गएको पहिरोले घर पुरिँदा बाबु आमा र बहिनीको निधनसँगै साहारावीहिन बनेका अस्मिता क्षेत्री र मञ्जु क्षेत्रीलाई नेकपा बागलुङले ३५ हजार रुपैयाँ नगद सहयोग गरेको हो ।
घरमाथिबाट आएको पहिरोमा परी अस्मिता र मञ्जुका बुवा ४६ वर्षीय बिष्णु बहादुर क्षेत्री, आमा ३५ वर्षीया विष्णुमाया क्षेत्री र बहिनी ५ महिनाकी सोनिया क्षेत्रीको निधन भएको थियो । पहिरोले घर पुरिँदा उनीहरुको सबै सम्पत्ती नष्ट भएको र हाल काकाको घरमा बस्दै आएका छन्। पहिरो पीडित मञ्जु क्षेत्रीलाई नेकपाका केन्द्रीय सदस्य गोबिन्दबहादुर नेपाली लगायतका नेताहरुले सहयोग रकम हस्तान्तरण गरेका हुन् ।
शोकसभा कार्यक्रममा बोल्दै नेता नेपालीले अस्मिता र मञ्जुलाई पुनःस्थापनाका लागि राज्य र स्थानीय बासिन्दाको सहयोग आवश्यक रहेको बताए । उनले वर्षायामको समयमा जोखिमप्रति सचेत रहन समेत गरे । कार्यक्रममा प्रतिनिधिसभाका सदस्य डा.सूर्य पाठकले पहिरोपीडित परिवारको राहत तथा पुनःस्थापनाका लागि पहलकदमी गर्ने प्रतिवद्धता व्यक्त गरे ।
कार्यक्रममा प्रदेशसभाका सदस्य सावित्रा राना, राष्ट्रिय सहकारी बैंकका सञ्चालक रामबहादुर जिसी, नेकपाका युवा नेता प्रदिप थापा लगायतले शोक मन्तव्य व्यक्त गरे । कार्यक्रम नेकपा बागलुङका कार्यदलका सदस्य कृष्ण पाठकको अध्यक्षता र कार्यदलका सदस्य लालबहादुर थापाको सञ्चालनमा सम्पन्न भएको थियो ।
प्रतिक्रिया दिनुहोस !
