अन्तर्राष्ट्रिय सञ्चारमाध्यम भन्छन्-'वास्तविक विश्वकप रूसले जित्यो'

मस्को : २१औं संस्करणको रुस विश्वकपमा विश्वभरका दुई सय नौ देशबीचको प्रतिस्पर्धाबाट छनोट भएर आएका ३२ टोलीबीचको अन्तिम भिडन्तले आइतबार औपचारिक वि श्राम लिँदैछ । एक महिनासम्म चलेको समूह चरण, नकआउट चरण, क्वार्टरफाइनल र सेमिफाइनलका भिडन्तले विश्वभरका फुटबल पारखीलाई मोहित बनायो ।

अन्तिममा उपाधिका लागि आइतबार साँझ फ्रान्स र क्रोएसियाबीच प्रतिस्पर्धा हुँदैछ । तर, अन्तर्राष्ट्रिय सञ्चारमाध्यमहरूले यस विश्वकपको वास्तविक विजेता रुस भएको घोषणा गरेका छन् । विश्वकपअघि राजनीतिसँग जोडेर रुसको आलोचना भइरहेको थियो । रुसले ऐतिहासिक रूपमा विश्वकप आयोजना गरेकोमा रुसलाई विश्वकपको विजेता भन्दै प्रशंसा गरिएको हो ।

रुस विश्वकपलाई आयोजकले सफल बनाउन कुनै कसर बाँकी नराखेको भन्दै विश्वभरका समर्थकले रुसी राष्ट्रपति भ्लादिमिर पुटिनको मुक्तकण्ठले तारिफ गरेका छन् । ‘पुटिनले यस विश्वकपबाट आफ्नो राजनीतिक छविलाई अझै माथि लगेका छन् ।

फुटबलको माध्यमबाट रुसप्रति पश्चिमी मुलुकको नकारात्मक धारणा चिर्न पुटिन सफल भए’, अन्तर्राष्ट्रिय समाचार एजेन्सी बीबीसीले भनेको छ । विश्वकपमा पुगेका लाखौं विदेशी पाहुनाले रुस प्रजातन्त्र, मानव अधिकार र अन्तर्राष्ट्रिय सम्बन्धप्रति सजग रहेकोसमेत उल्लेख गरेका छन् ।

रुस विश्वकपमा आउने पर्यटकले कहीँ नपाएको सुविधा पाएको इङ्ल्यान्डका समर्थक डारियनले बताए । ‘मस्कोका सडक रातदिन व्यस्त रहे र नाचगान भइरहे । अन्तर्राष्ट्रिय पाहुनालाई रत्तिभर भय भएन । रुसी स्वयंसेवकले रातदिन पाहुनाको स्वागत र सुरक्षाका लागि कुनै कसर बाँकी रोखनन् । २० वर्षदेखि मैले मस्कोको सडक नियालेको छु । अहिलेको जस्तो रमाइलो कहिल्यै थिएन । बेलायती सरकारले विश्वकपअघि रुसको बारेमा छरेको भ्रमपूर्ण प्रचारलाई विश्वकपले चिरेको छ । यस विश्वकपले पुटिनलाई ‘फेयर प्ले’ खेल्ने खेलाडीको रूपमा स्थापित गराएको छ’, डारियनले भने ।

जर्मनीका अर्का समर्थक लोथर माथ्युसले पछिल्लो ४० वर्षमा सबैभन्दा उत्कृष्ट विश्वकप आयोजना रुसले गरेको बताए । ‘यहाँको उल्लासमय वातावरणले संसारको मन जितेको छ । राष्ट्रपति पुटिन बाहिर चर्चा गरिएकोजस्तो खराब व्यक्ति रहेनछन् । धन्यवाद पुटिन, धन्यवाद रसिया’, लोथर भन्छन् ।

विश्व फुटबल महासंघ (फिफा)का अध्यक्ष जियानी इन्फान्टिनोले पनि रुसले विश्वकपलाई सोचेभन्दा माथिल्लो स्तरमा पु¥याएको बताएका छन् । ‘यो विश्वकप मेरा लागि पहिलो अनुभव हो । रुसका जनता र राष्ट्रप्रति म नतमस्तक छु । रुस विश्वकपले संसारभर नयाँ दृश्य सञ्चार गरेको छ’, पुटिनले भनेका छन् । विश्वकप रुसप्रतिको भ्रम चिर्न सफल भएको भन्दै रुसी विदेश मन्त्रालयसमेत अहिले मक्ख छ ।