मस्को : रुस विश्वकप फुटबलको उपाधि कसले जित्ला भन्ने चर्चा उत्कर्षमा पुगेको छ । उपाधिका लागि आइतबार हुने फ्रान्स र क्रोएसियाबीच भिडन्तसँगै विजेताले पाउने पुरस्कार राशिको कौतूहल पनि उत्तिकै छ । २१औं संस्करणमा आइपुग्दा विश्वकप विजेताको पुरस्कार राशिमा पनि वृद्धि भएको विश्व फुटबल महासंघ (फिफा)ले जनाएको छ ।
विश्वकप विजेताले तीन करोड ८० लाख डलर अर्थात् चार अर्बभन्दा बढी नेपाली रुपैयाँ पुरस्कार पाउनेछ । यो पुरस्कार राशि चार वर्षअघि ब्राजिलमा भएको २०औं संस्करणको विश्वकपमा भन्दा १२ प्रतिशतले बढी हो ।
रुस विश्पकप उपविजेताले दुई करोड ८० लाख अमेरिकी डलर पुरस्कार हात पार्नेछ ।
यसैगरी तेस्रो हुने टोलीले दुई करोड ४० लाख र चौथो हुनेले दुई करोड २० लाख अमेरिकी डलर पाउनेछ । क्वार्टरफाइनल अर्थात् अन्तिम आठमा पराजित हुने चार टोलीले एक करोड ६० लाख अमेरिकी डलर प्राप्त गर्नेछन् । यसैगरी अन्तिम १६ मा पराजित हुने आठ टोलीले एक करोड २० लाख र समूहगत चरणमा रोकिने प्रत्येक टोलीले ८०÷८० लाख अमेरिकी डलर प्राप्त गर्नेछन् ।
फिफाका अनुसार यस पटकको विश्वकपको कुल पुरस्कार राशि ४० करोड अमेरिकी डलर छ । सबै टोलीले पाउने यो रकममा विश्वकपमा छनोट भएपछि पाउने तयारी रकमसमेत जोडिएको छ । फिफाले सबै टोलीलाई प्रतियोगिता तयारीको रकमसमेत विश्वकप सम्पन्न भएपछि पुरस्कार राशिसँगै प्रदान गर्ने जनाएको छ ।
प्रतिक्रिया दिनुहोस !
