एन्टोइन ग्रिजम्यान (फ्रान्स)
फ्रान्सेली टोलीका महत्वपूर्ण खेलाडी हुन्, एन्टोइन ग्रिजम्यान । पछिल्ला कुनै पनि ठूला प्रतियोगितामा पहिलो रोजाइको स्ट्राइकर रहँदै आएका ग्रिजम्यान आफ्नो क्षमता र अनुभवका आधारमा एकसेएक खेलाडी उत्पादन गर्ने फ्रान्सेली टोलीका मुख्य स्ट्राइकर हुन् । स्पेनी क्लब एट्लेटिको म्याड्रिडबाट व्यावसायिक फुटबल खेल्दै आइरहेका ग्रिजम्यान बायाँतर्फको क्षेत्रमा पहिलो वा दोस्रो स्ट्राइकरका रूपमा समेत प्रभावकारी तरिकाले खेल्न सक्छन् ।
त्यसैले उनको यही फरक क्षमताले उनलाई फ्रान्सेली टोलीमा लामो समयदेखि महत्वपूर्ण खेलाडीका रूपमा स्थापित गराएको छ । उनी फ्रान्सेली राष्ट्रिय टोलीबाट पछिल्लो दुई वर्षको अवधिमा लगातार दुई ठूला प्रतियोगिताको फाइनल खेल्दैछन् । सन् २०१६ मा आफैंले आयोजना गरेको युरोकपमा फ्रान्सले फाइनल खेल्दा उनै ग्रिजम्यान प्रतियोगिताकै सर्वाधिक गोलकर्ता बनेका थिए । यद्यपि त्यस बेला फ्रान्स फाइनलमा पोर्चुगलसँग पराजित हुँदै उपविजेतामा सीमित हुन पुगेको थियो ।
त्यही पराजयको पीडालाई भुलेर ग्रिजम्यान आफ्नो देशलाई २० वर्षपछि फेरि विश्वकपको उपाधि दिलाउने अभियानमा जुटेका छन् । त्यसका लागि जारी रुस विश्वकपको फाइनलमा फ्रान्सले आइतबार क्रोएसियासँग खेल्दै छ । यही अवसरमा टोलीलाई उपाधि दिलाउन उनले महत्वपूर्ण योगदान गर्ने अपेक्षा गरिएको छ । सन् २०१४ देखि फ्रान्सेली राष्ट्रिय टोलीबाट खेल्न थालेका ग्रिजम्यानले अहिलेसम्म ६० खेल खेल्दै २३ गोल गरेका छन् ।
लुका मोड्रिच (क्रोएसिया)
मिडफिल्डमा सधैं सशक्त रूपमा प्रस्तुत हुने लुका मोड्रिचकै प्रदर्शनमा क्रोएसिया जारी रुस विश्वकपको फाइनलमा पुगेका छ । टोलीका कप्तानसमेत रहेका मोड्रिच यस्ता भाग्यमानी खेलाडी रहे, जसले आफ्नो नेतृत्वमा क्रोएसियालाई पहिलोपटक विश्वकपको फाइनलमा पुर्याएका छन् ।
उनकै नेतृत्वमा क्रोएसियाले जारी प्रतियोगितामा आफूले खेलेका सबै खेलमा जित हात पारेको छ । स्पेनी क्लब रियल म्याड्रिडबाट व्यावसायिक फुटबल खेल्दै आइरहेका मोड्रिचले टोलीको यो सफलतामा खेलाडी र कप्तानको हैसियतमा महत्वपूर्ण योगदान पुर्याउँदै आएका छन् । त्यसैले क्रोएसियालाई पहिलोपटक विश्वकपको उपाधि दिलाउन पनि मिडफिल्डबाट उनै मोड्रिचले निर्णायक भूमिका निर्वाह गर्ने अपेक्षा गरिएको छ ।
मिडफिल्डबाट आफ्ना रक्षकहरूलाई सहयोग गर्नमात्रै हैन, आफ्ना स्ट्राइकरलाई गोलका राम्रा अवसर सिर्जना गर्न र आफैं पनि गोल गर्न मोड्रिच सक्षम खेलाडी हुन् । उनी आफ्नो पोजिसनमा मात्रै रहँदैनन्, बलका लागि मैदानको सबै ठाउँमा पुगेकै हुन्छन् । त्यसले पनि विपक्षी खेलाडीका लागि मोड्रिचलाई रोक्नु मुस्किल हुने गर्छ । सुरक्षित ट्याकल प्रहार गर्दै विपक्षी खेलाडीसँग बल फुत्काउन सक्नु उनको अर्काे खुबी हो । त्यसैले क्रोएसियाको ऐतिहासिक सफलता सम्भव बनाउन मोड्रिचको भूमिका महत्वपूर्ण हुने सबैको अनुमान छ ।
सन् २००६ बाट क्रोएसियाको राष्ट्रिय टोलीबाट खेल्दै आइरहेका मोड्रिचले हालसम्म एक सय १२ खेल खेल्दै १४ गोल गरेका छन् । आइतबारको फाइनल खेलको समाप्तिसँगै उनले आफ्नो गोलको संख्या पनि वृद्धि गर्ने अपेक्षा गरिएको छ ।
प्रतिक्रिया दिनुहोस !
