धरानः सप्तकोसीमा पानीको बहाव बढेर यो वर्षकै उच्च भएको छ । पूर्वी पहाडी र हिमाली जिल्लामा लगातार वर्षा भइरहेका कारण सप्तकोसीमा पानीको बहाव यो वर्षकै उच्च भएको हो । बहाव उच्च भएपछि सप्तकोसी व्यारेजमा खतराको संकेत रातो बत्ती बालिएको छ ।
शनिवारदेखि मध्यरातिदेखि सप्तकोसीमा पानीको बहाव निरन्तर बढिरहेको छ । शनिवार राति सप्तकोसीमा पानीको बहाव २ लाख २४ हजार ८ सय ७५ पुगेको थियो । आइतवार पानीको बहाव केही घटेर प्रतिसेकेण्ड २ लाख २२ हजार ६ सय २५ क्युसेक पुगेको सुनसरीका प्रहरी नायव उपरीक्षक नारायणप्रसाद चिमोरियाले बताएका छन् ।
सप्तकोसीमा एक लाख ५० हजार क्युसेक पानीको बहाव पुगेपछि खतरा मान्न्छि । पानीको बहाव निरन्तर बढिरहे पनि भारतको नियन्त्रणमा रहेको व्यारेजका सबै ढोका खोलिएको छैन । भारतले आइतवार व्यारेजका ५६ मध्ये २८ ढोका खोलेको छ ।
भारतले कोसी व्यारेजका सबै ढोका नखोलेपछि कोसी आसपासका बासिन्दाहरु त्रसित भएका छन् । एकातिर जीर्ण कोसी व्यारेजको मर्मत नभएको अवस्था पानीको बहाव उच्च हुँदासमेत व्यारेजका सबै ढोका नखोलिँदा स्थानीय त्रसित हुनुपरेको कोसीपीडित संर्घष समितिका सचिव बाबुराम कार्कीले बताएका छन् ।
व्यारेजका सबै ढोका नखोलेका कारण बालुवाले सप्तकोसीको सतह अग्लिदै गएकाले जुनसुकै बेला धार परिवर्तन गरी कटान गर्न सक्ने भएकाले स्थानीयमा त्रास उत्पन्न भएको सचिव कार्कीको भनाई छ ।
‘कोसीमा पानीको बहाव बढेको साइरन बजिरहेको हुन्छ । हामी कसरी सुरक्षीत हुने भनेर सोचिरहेका हन्छांै’, स्थानीय दुर्योधधन घिमिरेले भने, ‘भारतले व्यारेजका ढोका थुनेर पानी बग्न नदिएका कारण कोसी आसपासका बासिन्दा सधैँ त्रासमा बस्न बाध्य हुनुपरेको छ ।’
बराहक्षेत्र नगरपालिकाका मेयर निलम खनालले भारतले सबै व्यारेजका ढोका बन्द गरी सर्बसाधारणलाई त्रसित बनाउने गरेको बताएका छन् । उनले बर्षातको समयमा व्यारेजका सबै ढोका खोल्न पटक पटक आग्रह गर्दा समेत भारतले अटेर गरेको बताएका छन् ।
प्रतिक्रिया दिनुहोस !
