चन्द्रागिरिमा प्रधानमन्त्री ओलीको कबिता: मरेपछि पनि सपना देख्न पाऊँ

काठमाडौँ: प्रधानमन्त्री केपी शर्मा ओलीले चन्द्रागिरिमा पुगेर कबिता लेखेका छन् । मदन भण्डारी कला साहित्य प्रतिष्ठानले आयोजना गरेको  वृहत हिमवत् खण्ड कला साहित्य सम्मिलन २०७५ को अन्तिम दिन प्रम ओलीले चन्द्रागिरिमा पुगेर कबिता लेखेका हुन् । 

प्रम ओलीले आफ्नो कबिताको सारका रुपमा ‘मरेपछि पनि सपना देख्न पाउँ’ भनेका छन् । पुरा नहुने सपना देखाएर जनतालाई झुक्याएको भन्दै आलोचना भइरहँदा प्रम ओलीले फेरि सपनाकै कुरा गरेका हुन् । 

यस्तो छ प्रधानमन्त्रीले लेखेको शीर्षकबिनाको कबिता

परिवर्तनशील दुनियाँमा सधैँ बाँचेको पो को छ र !  
बाँचुन्जेल हो जिन्दगी मर्नु त छँदैछ
मरे पनि केही छैन त्यसपछि पनि सपना देख्न पाऊँ 
सगरमाथा लुम्बिनी मेची महाकाली
हाम्रा लहलह खेतबाली झपक्का कान्ला र आली
सपनामा भए पनि देख्न पाऊँ 
चन्द्रगिरिको डाँडामा आएर सपनामा
भावी सन्तति मुस्कुराएको देख्न पाऊँ
तिनको हँसिलो मुहारको तस्बिर खिच्न पाऊँ
म मरे पनि केही छैन त्यसपछि पनि सपना देख्न पाऊँ 

प्रधानमन्त्रीले कबिता सिर्जना गरेसँगै यो कार्यक्रममा देश विदेशका साहित्यप्रेमीहरुले पनि साहित्य सिर्जना तथा बाचन पनि गरेका थिए । प्रदेश नं १ का कवि टीका आत्रेयले कविता वाचन गर्न थाल्नुअघि नै चन्द्रागिरिको भालेश्वरको काखमा रहेको सभाहल काव्यिक गुञ्जन सिञ्चन भइसकेको थियो । 

'सिङ्गो विश्व अटाउने प्रकृतिको होला तथागत् कहाँ ? 
देख्दैछौ किन जिन्दगी भन युवा के छैन नेपालमा ?' 

प्रधानमन्त्री केपी शर्मा ओली र स्वदेश विदेशका वरिष्ठ साहित्यकारहरु सातै प्रदेशका प्रतिनिधि कविका समृद्धिका स्वरमा आफ्ना कानलाई अडेस लगाइरहेका थिए । आफूले देखेको “समृद्ध नेपाल, सुखी नेपाली” को सपनालाई स्रष्टाका सिर्जनात्मक कविताका रुपमा आज “चन्द्रागिरिबाट समृद्धिका स्वर” सिर्जना यात्रामा प्रधानमन्त्री ओलीले अनुभूत गरेका थिए । 

कविता वाचन हुनुपूर्व पर्यटकीयस्थल चन्दागिरिको भालेश्वर मन्दिर अवलोकन र नेपाल एकीकरणका अभियन्ता पृथ्वीनारायण शाहको शालिकमा माल्यार्पण गरेर स्रष्टाहरुलाई शुभकामना दिँदै प्रधानमन्त्री ओलीले हरेक नेपालीले कर्म मौरी झैँ समृद्धिको लागि काम गर्न आग्रह गरेका थिए । 

त्यसैअनुरुप कविहरुले पनि श्रम, सीप, सिर्जना, स्वदेशमा रोजगार, आपसी एकता, प्राकृतिक सम्पदाको उपयोग, कुशासनको अन्त्य आदि विषयलाई कविताको धागोले उनेर समृद्धिको माला उपहार प्रदान गरेका थिए । 

नेपाली भाषाका आदिकवि भानुभक्त आचार्यको २०५ औं जन्मजयन्तीका अवसरमा मदन भण्डारी कला साहित्य प्रतिष्ठानले आयोजना गरेको त्रिदिवसीय वृहत हिमवत् खण्ड कला साहित्य सम्मिलन २०७५ को अन्तिम दिन स्रष्टाहरु चन्दागिरि सिर्जनायात्रामा भेला भएका थिए । सम्मिलन आयोजनाका परिकल्पनाकार प्रधानमन्त्री ओली पहिलो र अन्तिम दिन स्रष्टाहरुको साथ रहे । 

प्रधानमन्त्रीसँगै वरिष्ठ साहित्यकार, चन्द्रागिरि हिल्सका अध्यक्ष चन्द्र ढकाल पनि मञ्चमा बसेर कविता श्रवणबाट मन्त्रमुग्ध भएको थिए । कविता फुरेमा कार्यक्रमको अन्त्यसम्म आफूले पनि कविता सुनाउने प्रधानमन्त्रीको उद्घोषले सहभागीमा अर्को उत्सुकता पनि पैदा भइरहेको थियो । 

छिनछिनमा परिवर्तन हुने चन्द्रागिरिको वातावरणलाई नियाँल्दै नयाँ समृद्धिको सपना देख्ने कविहरुले घाम, पानी, कुहिरोको दृष्यलाई पृष्ठभागमा राखेर हिमाली संस्कृति र सभ्यताको झलक पनि प्रस्तुत गरेका थिए । काठमाडौँका कवि डा रामप्रसाद ज्ञवालीले भाका हालेर सुमधूर स्वरमा यसरी कविता भनेका थिए । 

“उड्दैछन् पुतली स्वयम् सुर लिई आकाशमा फर्रफर 
नेपाली यदि स्वाभिमान छ भने आफैँ उठाऊ शिर” 

गण्डकी प्रदेशको गोरखाका कवि नारायण पोखरेलले शार्दुलविक्रीडित छन्दमै थपे । 
“ऊर्जा छैन विदेशमा कहरले नेपालको तागत 
के समृद्ध बनाउने रहर यो डाकेर अभ्यागत” 

प्रदेश नं ५ को अर्घाखाँचीका कवि बुँद रानाले गजलबाट समृद्धिको तीर्खा यसरी पोखेका थिए । 

“अरु छैन धोको यति गर्न पाउँ 
वतन्को सिपाही भई मर्न पाउँ 
चुनौतीहरुको छ जंघार चर्को 
नमानेर झर्को सधैँ छर्न पाउँ” 

कविहरु डिएम कन्दङ्वा, आभाष सेतु सिंह, प्रकाश चापागार्इं, लक्ष्मी माली, लक्ष्मी थापा, हीरा शर्मा, वासुदेव पाण्डे, रघुराम कडरिया, तुल्सी शर्माले समृद्धिका स्वरमा आफ्ना सिर्जना मिसाएका थिए । 

सम्मिलनमा सहभागी विदेशी स्रष्टाहरुले पनि आफ्ना रचना प्रस्तुत गरेका थिए । भुटानका छत्रपति फुयाँल, भारत सिलगडीका ज्ञानेन्द्र खतिवडा र कालुसिंह रणपहेँली, दार्जिलिङ्का कर्ण विरह, खस्र्याङ्की उषाकिरण सत्यदर्शी, आसामका विष्णु शास्त्रीलगायत बंगलादेश, थाइल्याण्डलगायत मुलुकका सहभागी कविले कविता प्रस्तुत गरेका थिए । रासस