काठमाडौं : सिन्धुली कमलाखोजका दनुवार समुदायले नाच्दै आएको ६ सय वर्ष पुरानो ‘बड्की नाच’ दुई दशक यताबाट संकटमा थियो । त्यो नाचलाई अब स्थानीय दनुवार समुदायले संरक्षणसँगै प्रस्तुत गर्न थालेका छन् ।
यसै क्रममा नेपाल संगीत तथा नाट्य प्रज्ञाप्रतिष्ठानले बड्की नाचलाई प्रोत्साहित गर्न कमलामाई नगरपालिका-१४, चन्दनपुरका बड्की नाचका कलाकारलाई विभिन्न वाद्यसामग्री प्रदान गरेको छ।
प्रज्ञाप्रतिष्ठानको नृत्य विभागका संयोजक एवं प्राज्ञ परिषद् सदस्य रमेशरञ्जन झाको संयोजकत्वमा वाद्यसामग्री प्रदान गरिएको हो । नाचका लागि आवश्यक तबला, मादल, नाचका लागि आवश्यक घुँघरुलगायतका सामग्री प्रदान गरिएको हो ।
नाच समूहका प्रमुख पल्टु कुँवरसहित नाच टोलीलाई जिल्ला समन्वय समिति सिन्धुलीका प्रमुख शंकर बर्मा, उपप्रमुख सम्झना अधिकारी दनुवार, नाट्य विभाग प्रमुख रमेशरञ्जन झाले वाद्यसामग्री संयुक्त रूपमा हस्तान्तरण गरे ।
पल्टुसहित बिल्टा कुँवर, रानी अधिकारी, रक्षा कुँवर, बेचना धामी, गोरे अधिकारी, काशीलाल धामी, शर्पा कुँवर, कन्या थारू, गेन्मा कँवर र विश्वनाथ कुँवरको नाच टोलीले दुई घन्टा बड्की नाच प्रस्तुत गरेको थियो । लामो समयपछि प्रस्तुत गरिएको कृष्ण चरित्रमा आधारित यो नाच स्थानीय अग्रजदेखि नयाँ पुस्तासम्मले रुचाएका थिए ।
कार्यक्रममा जिल्ला समन्वय समिति सिन्धुलीका उपप्रमुख सम्झना अधिकारी दनुवारले अब चाँडै सो क्षेत्रमा दनुवार संग्रहालय स्थापना गर्ने बताइन् । उनले बड्की नाच लोप हुन नदिन नयाँ पुस्तालाई सिकाउनुपर्ने सुझाव दिइन् ।
जिल्ला समन्वय समिति सिन्धुलीका प्रमुख शंकर बर्माले बाल्यकालमा आफूले देखेको नाच लामो समयपछि दनुवार समुदायले पुनः नाचेको देख्न पाउँदा खुसी लागेको बताए । यो नाच संरक्षण गर्न आवश्यक भएकाले सम्बन्धित कलाकारलाई प्रशिक्षणसँगै आवश्यक भेषभूषा पनि उपलब्ध गराउने उनले बताए ।
प्रतिक्रिया दिनुहोस !
