हेलसिन्की : अमेरिकी राष्ट्रपति डोनाल्ड ट्रम्प र रूसी राष्ट्रपति भ्लादिमिर पुटिनले सुमधुर सम्बन्ध बनाउने जानकारी दिएका छन् । सोमबार हेलसिन्कीमा भएको द्विपक्षीय वार्तामा दुवै नेताले यस्तो बताएका हुन् । हुने भएको छ ।
शिखर वार्ताका बेला अमेरिकी राष्ट्रपति ट्रम्पले रूससँग असाभारण सम्बन्ध बनाउने प्रतिबद्धता व्यक्त गरेका छन् । यसैगरी पुटिनले पनि दुनियाँभर देखिएका विवाद आपसी सहमतिमा समाधान गरिने जानकारी दिएका छन् । पुटिनसँग भेटवार्ताका लागि ट्रम्प फिनल्यान्ड आइपुगेका हुन् । हालैको युरोपको उतारचढावपूर्ण भ्रमणपछि उनी पुटिनलाई भेट्न यहाँ आएका हुन् । वार्ताका क्रममा ट्रम्पले भने, ‘अमेरिका र रूस मिलेर अघि बढेका थिएनन् । अब संसारले हामीले एकसाथ देख्न चाहेको छ ।’ रूसी राष्ट्रपति पुटिनले पनि अन्तर्राष्ट्रिय विवादमा ट्रम्पसँग सम्पर्क बनाउने प्रतिबद्धता व्यक्त गरेका छन् । दुवै देशका नेता मिलेर अन्तर्राष्ट्रिय समस्या र संवेदनशील विषयमा छलफल गर्ने पुटिनको भनाइ छ ।
अमेरिकी राष्ट्रपति डोनाल्ड ट्रम्पले रूससँगको सम्बन्ध बिगार्न अमेरिकी फेडरल ब्युरो अफ इन्भेस्टिगेशन (एफबीआई) जिम्मेवार भएको बताएका छन् । रूसका राष्ट्रपति भ्लादिमिर पुटिनसँग बैठक गर्नुपूर्व उनको यस्तो धारणा सार्वजनिक भएको हो । एफबीआईकै कारण दुई देशबीचको सम्बन्धमा अनावश्यक तनाव सिर्जना भएको उनले आरोप पनि लगाए । अमेरिकाका विशेष अभियोजक रबर्ट मुलरको अनुसन्धान उद्धृत गर्दै ट्रम्पले ट्विट गरे, ‘रूससँग हाम्रो सम्बन्ध कहिल्यै पनि यति खराब थिएन । अनुसन्धानको नाममा अमेरिकी मूर्खता र बेवकुफीका कारण यो भएको छ ।’ गत साता मुलरले सन् २०१६ मा भएको अमेरिकी राष्ट्रपतिको निर्वाचनका क्रममा डोनाल्ड ट्रम्पकी प्रतिद्वन्द्वी हिलारी क्लिन्टन र उनको डेमोक्र्याटिक पार्टीको कम्प्युटर सर्भर ह्याक भएको दाबी गरेका थिए । उक्त ह्याकमा रूसको हात रहेको मुलरको दाबी छ । यसका लागि १२ जना रूसी गुप्तचर अधिकारी सक्रिय भएको उनको आरोप छ । यो सबै जानकारी ट्रम्पलाई भएको हल्ला हुने गरेको छ । यसै विषयमा ट्रम्पले रूसको विरोध गर्नुपर्ने डेमोक्र्याटको माग छ । हेलसिन्कीमा भइरहेको सम्मेलनमा ट्रम्पले रूसी हस्तक्षेपका बारेमा मुद्दा उठाउन उनीहरूले दबाब दिँदै आएका छन् ।
नेटो कहिल्यै बलियो हुँदैन : ट्रम्प
अमेरिकी राष्ट्रपति डोनाल्ड ट्रम्पले उत्तर एटलान्टिक सन्धि संगठन (नेटो) कहिल्यै बलियो संगठनका रूपमा स्थापित नहुने बताएका छन् । उनले भने, ‘नेटो संगठन कहिल्यै बलियो पनि हुँदैन र एकीकृत संगठनको रूपमा पनि काम गर्न सक्दैन ।’ सोमबार बिहानको खाजा खाने क्रममा फिनल्यान्डका राष्ट्रपति सउली निनिस्टोसँग भएको कुराकानीमा ट्रम्पले यस्तो धारणा राखेका हुन् ।
रूसी राष्ट्रपति भ्लादिमिर पुटिनसँग वार्ता गर्न राष्ट्रपति ट्रम्प सोमबार हेलसिन्की आइपुगेका छन् । त्यसै क्रममा उनले यस्तो प्रतिक्रिया दिएका हुन् । उनीहरूबीचको भेटवार्तालाई विश्वका सञ्चारमाध्यमले पनि निकै प्रचार गरिरहेका छन् । युरोप भ्रमणबाटै पछ्याइरहेका मिडियाले यहाँ राष्ट्रपति ट्रम्पका हरेक क्रियाकलापमा निकै चासो दिएका छन् । राष्ट्रपति ट्रम्पले हालैमात्र गरेको युरोपको उतारचढावपूर्ण भ्रमणपछि पुटिनलाई भेट्न उनी यहाँ आइपुगेका हुन् । यस उच्चस्तरीय वार्ताबाट हालैका दिनमा यी दुई देशबीच विकसित राजनीतिक असमझदारीहरूका बारेमा व्यापक मात्रामा छलफल हुने बताइएको छ ।
प्रतिक्रिया दिनुहोस !
