गोरखा : विकासका लागि निर्माण गरिएको मोटरबाटोले पहिरो निम्त्याएपछि गोरखाका तीन गाउँका बासिन्दा जोखिममा बस्न बाध्य भएका छन् । केही दिनदेखि निरन्तर पानी पर्न थालेपछि मोटरबाटो निर्माण गरिएको धार्चे गाउँपालिका ५ को लप्सीबोट-७ को खानीबेंसी र लापुगाउँका बासिन्दाले पहिरोको जोखिम बढेको जनाएका छन् ।
भूकम्पपछि हालै निर्माण गरिएको घर पनि पहिरोको जोखिममा परेको स्थानीयको भनाइ छ । ‘गाउँमाथि पनि, गाउँमुनि पनि मोटरबाटो बनाइएको छ’, लप्सीबोटका रामप्रसाद गुरुङले भने, ‘अहिले पानी पर्न थालेपछि घरमुनि पनि पहिरो गयो, घरमाथिबाट पनि पहिरो आएको छ ।’ गाउँका १० घर जोखिममा परेको उनले बताए ।
‘रामबहादुर गुरुङ, सीताराम गुरुङ, आसमान गुरुङ, तिलबहादुर गुरुङ, सुपाल गुरुङ, पूर्णमाया गुरुङ, माहिला गुरुङ, पूर्णबहादुर गुरुङ, सन्तबहादुर गुरुङ र भीमबहादुर गुरुङको घर जोखिममा पर्यो’, उनले भने, ‘रामबहादुरको त गोठ पहिरोले लगिसक्यो ।’ सडक निर्माण गर्नुअघि राम्रोसँग प्राविधिक अध्ययन नगरेका कारण अहिले गाउँलेले दुःख पाएका उनले बताए ।
गाउँभन्दा करिब पाँच मिटर नजिकै पहिरो आइपुगेको गाउँपालिकाका अध्यक्ष सन्तोष गुरुङले बताए । ‘भिरालो जमिन छ । त्यसमा पनि राम्ररी अध्ययन नगरी रोड बनाइदिए’, उनले भने, ‘पानी पर्न थालेपछि बग्न थालिहाल्यो ।’ प्रहरी आएर रिपोर्ट लिएर गइसकेको उनले बताए ।
नेपाली सेनाले निर्माण गरेको सडकका कारण वडा नं. ७ खानीबेंसीका १०÷१२ घर जोखिममा परेको वडाध्यक्ष सूर्यमान गुरुङले बताए । ‘केही दिन अघिदेखि परेको पानीले खानीबेंसीको १०÷१२ घर पहिरोमा पर्न लागेको छ’, उनले भने, ‘लापुगाउँको पनि कालरात्रि स्कुल आसपास पहिरो गएको छ ।’ पहिरो नियन्त्रण गर्न तारजालीको खाँचो परेको स्थानीय शुकराज गुरुङले बताए ।
प्रतिक्रिया दिनुहोस !
