धनगढी : कैलालीको टीकापुर नगरपालिका-९ मा लाखौं बजेटको कालोपत्रे निर्माण सम्पन्न नहुँदै टालटुल गरिएको छ । बजेट सक्नका लागि कमसल सामग्री प्रयोग गरी हतारमा गरिएको कालोपत्रे निर्माण सम्पन्न नहुँदै उप्किएपछि टालटुल गरिएको हो ।
निर्माण सम्पन्न नहुँदै असार दोस्रो साता आएको पानीले उक्त सडकमा धेरै ठाउँमा भत्किएको छ । नगरपालिकाले वडा नम्बर ९ को झुगादेखि गाउँघर क्लिनिकसम्मको २ सय ६२ मिटरका लागि कल्भर्ट निर्माणबापत १५ लाख र सडक निर्माणका लागि ३५ लाख गरी ५० लाख बजेट विनियोजन गरेको थियो ।
कालोपत्रे निर्माण सम्पन्न नहुँदै उप्किन थालेपछि स्थानीय आक्रोशित भएका छन् । उनीहरूले नगरपालिकाले दिगो विकास गर्न नभई बजेट सिध्याउने काम मात्रै गरेको स्थानीय प्रदेश चौधरीले गुनासो गरे । हतारमा गरिने विकासले गर्दा एक पटक पानीले कालोपत्रे भत्किएको छ । उनले एक पटक भत्किएको कालोपत्रे पुनः गरे पनि त्यो दिगो नहुने बताए ।
वडाध्यक्ष लौटन चौधरीले उपभोक्ता समितिमार्फत दुई महिनाअघि कालोपत्रे सुरुभएको बताउँदै कालोपत्रे भत्किएको र पुनर्निर्माणपछि मात्र निर्माण कम्पनीले भुक्तानी पाउने जानकारी दिए । ‘कालोपत्रे हुँदा उपभोक्ता समिति र हामी पनि सँगसँगै थियौं । पानी पर्नुभन्दा पहिले ठिकै थियो । तर, केही दिनअगाडिको वर्षाले सडक भासियो । कालोपत्रे फुट्यो,’ उनले भने, ‘काम अलि हतारमा भयो । तर, मर्मत नभएसम्म कालोपत्रे सम्पन्न भएको सिफारिस हुँदैन ।’
वडाकै प्रेम चौराहादेखि तारागाउँसम्म १ सय २७ मिटर सडक कालोपत्रे गर्न नगरपालिकामार्फत सीमा क्षेत्र विकास कार्यक्रमको २५ लाख ५५ हजार बजेट छुट्याइएको थियो । सो सीमा क्षेत्र विकास कार्यक्रमको जम्मा बजेटमा ५ लाख ५५ हजार रुपैयाँ जन श्रमदान रहेको नगरपालिकाका इन्जिनियर नवराज जोशीले जानकारी दिए ।
तर, हाल सो कालोपत्रे ठाउँठाउँमा फुट्नुका साथै कल्भर्ट आसपास कालोपत्रे नै भासिएकाले पुनर्निर्माण गरेर मात्र योजना सम्पन्न हुने बताए ।
कालोपत्रे निर्माण सम्पन्न भए पनि नगरपालिकामा रकम निकासाका लागि प्रगति प्रतिवेदन बुझाउन बाँकी रहेको उनको भनाइ छ । असार मसान्तभित्र सडक कालोपत्रे गर्ने सम्झौता भएको हो । नगर प्रमुख तपेन्द्र रावलले आफूले उक्त कालोपत्रेको स्थलगत अनुगमन गरेको र भत्किएको ठाउँमा पुनः कालोपत्रे गरेको बताए ।
सडक छेउछाउमा राम्रोसँग माटो पटानी नगरेको र राम्रोसँग रोलर प्रयोग नगर्दा कालोपत्रे उप्किएको नगर प्रमुख रावलको भनाइ छ । उप्किएको ठाउँमा पुनः कालोपत्रे नहुन्जेलसम्म बाँकी रकम निकासा नदिने नगर प्रमुख रावलले बताए ।
प्रतिक्रिया दिनुहोस !
