भैरहवा : रूपन्देहीमा पूर्वाधार विकासका लागि आएको २ अर्ब रकम फ्रिज भएको छ । आर्थिक वर्षको अन्तिम समयमा विकास निर्माणका कामलाई तीव्रता दिए पनि बजेट खर्च गरेर सकिएको छैन । जिल्लामा असारमा मात्रै ३ अर्ब बजेट खर्च भएको छ । चालु र पुँजीगत गरी कुल २ अर्ब बढी बजेट फ्रिज भएको जिल्ला कोष तथा लेखा नियन्त्रक कार्यालयले जनाएको छ ।
असारमा मात्रै सबैभन्दा बढी खर्च गर्नेमा सहरी विकास तथा भवन निर्माण विभाग, डिभिजन सडक कार्यालय, खानेपानी तथा सरसफाइ डिभिजन कार्यालयलगायत कार्यालय/आयोजना छन् ।
कोष तथा लेखा नियन्त्रण कार्यलयले भैरहवामा एक कार्यक्रमको आयोजना गरी ०७४/७५ को जिल्लाको आम्दानी, निकासा तथा खर्च सार्वजनिक गरेको छ । जसमा असारमा मात्रै २ अर्ब ८० करोड ४७ लाख एक हजार ७ सय ९८ रुपैयाँ पुँजीगत बजेट र चालु तथा पुँजीगततर्फ गरी कुल २ अर्ब ८ करोड ८१ लाख ३१ हजार एक सय ८२ रुपैयाँ बजेट फ्रिज भएको जिल्ला कोष तथा लेखा नियन्त्रक कार्यालय प्रमुख मतिप्रसाद भुसालले बताए ।
पुँजीगततर्फ ठुल्ठूला विकासे अड्डाहरूले समयमा बजेट खर्च गर्न नसक्दा २ अर्ब बढी बजेट फ्रिज भएको हो । कार्यालयका अनुसार कुल बजेट २१ अर्ब ८२ करोड १० लाख ७३ हजार ६७ रुपैयाँ रहेकोमा १९ अर्ब ७३ करोड २९ लाख ४१ हजार ८ सय ८५ रुपैयाँ खर्च भएको छ । खर्च भएको बजेट बजेटको ९०.४३ प्रतिशत हो ।
आव ०७४/७५ मा पँुजीगततर्फ ८ अर्ब २ करोड ९६ लाख ६६ हजार ३ सय रुपैयाँ बजेट विनियोजन भएकोमा ६ अर्ब ८१ करोड एक लाख ४० हजार ३ सय २७ रुपैयाँ खर्च भएको प्रमुख भुसालले बताए । यो पुँजीगत बजेटको ८४.८१ प्रतिशत खर्च हो ।
त्यस्तै उनले चालुतर्फ कुल १३ अर्ब ७९ करोड १४ लाख ६ हजार ७ सय ६७ रुपैयाँ बजेट विनियोजन भएकोमा १२ अर्ब ९२ करोड २८ लाख एक हजार ५ सय ५७ रुपैयाँ खर्च भएको बताए ।
उनले जिल्लामा भएको खर्च सन्तोषजनक रहेको र विस्तारै समयमा खर्च गर्ने ट्रेन्ड बढ्दै जाने बताए । गत आव ०७३/७४ मा पुँजीगततर्फ ८ अर्ब ९१ करोड २९ लाख ४५ हजार ७१ रुपैयाँ विनियोजन भएकोमा ६ अर्ब ७० करोड ४० लाख ८ हजार ४ सय ९ रुपैयाँ खर्च भएको थियो र चालुतर्फ कुल ११ अर्ब ९२ लाख ४७ हजार ६ सय ४५ रुपैयाँ बजेट विनियोजन भएकोमा ८ अर्ब ७९ करोड ५३ लाख ८९ हजार ७ सय ३५ रुपैयाँ खर्च भएको थियो ।
राजस्व संकलनमा वृद्धि
जिल्लामा आव ०७४/७५ मा राजस्व संकलनमा वृद्धि भएको छ । कार्यालयका अनुसार राजस्व संकलन १३.१८ प्रतिशतले वृद्धि भएको हो ।
०७४/७५ मा ९० अर्ब ३६ करोड ६५ लाख २५ हजार ८ सय ६२ रुपैयाँ राजस्व संकलन भएको कोलेनिका रूपन्देहीकी सूचना अधिकृत मञ्जु पन्थीले बताइन् । गत आव ०७३/७४ मा ७९ अर्ब ८३ करोड ६९ लाख ६७ हजार ५ सय ७९ रुपैयाँ राजस्व संकलन भएको थियो ।
राजस्व संकलन गर्नेमध्ये सबैभन्दा बढी आन्तरिक राजस्व कार्यालय भैरहवाले रहेको छ । उसले ०७४/७५ मा ४९ अर्ब ८६ करोड ९१ लाख ४२ हजार रुपैयाँ राजस्व संकलन गरेको कोष तथा लेखा नियन्त्रक कार्यालय रूपन्देहीले जनाएको छ ।
प्रतिक्रिया दिनुहोस !
