दार्चुला : नेपाल–भारतको दार्चुला सीमामा केही दिनदेखि चेकजाँचका नाममा नेपालीमाथि दुव्र्यवहार भइरहेको छ । यार्सागुम्बालगायत जडीबुटी चोरी–निकासी हुने भन्दै भारतीय सुरक्षाकर्मीले चेकजाँचलाई कडा गरेपछि दुव्र्यवहारका घटना पनि बढेका
हुन् ।
नेपाली नागरिकले ल्याउने दैनिक उपभोग्य सामग्रीमा अहिले भारतीय सुरक्षाकर्मीले कडिकडाउ गरेको छ । भारतमा नेपालको भन्दा केही सस्तो पर्ने भएकाले नेपालीहरू भारतबाटै सामान ल्याउने गरेका हुन् ।
नेपाल–भारत जोड्ने मुख्य नाका दार्चुलाको पुल घाँटबाट विभिन्न खाद्यान्न, निर्माण सामग्री, तरकारीसमेत आयात गर्ने दार्चुलाका व्यापारीलाई समेत पछिल्लो समय निकै समस्या हुने गरेको व्यापारी जमनसिंह धामीले बताए ।
उनले सीमावर्ती क्षेत्रमा चेकजाँचको नाममा नेपालीलाई दुःख दिने काम भइरहेको बताए । यार्सागुम्बा, सतुवालगायत विभिन्न जडीबुटी ओसारपसार हुने समय भएकाले अवैध रूपमा हुने ओसारपसार गर्न नदिन भारतीय सुरक्षाकर्मीले चेकजाँच कडाइ गरेका हुन् ।
भारतीय सुरक्षाकर्मीले १÷२ किलोभन्दा बढी सामान ल्याएमा जीएसटी बिल माग्ने र भन्सार तिर्न बाध्य गराउने गरेको स्थानीयले बताएका छन् । भारतीय व्यापारीले सामग्री किन्दा जीएसटी बिल दिन मान्दैनन् भने नाकामा भारतीय सुरक्षाकर्मी र कस्टमले अनिवार्य जीएसटी बिल मागेर नेपाली नागरिकलाई दुःख दिने गरेको स्थानीय कलावती धामीले बताइन् ।
भारतीय सुरक्षाकर्मीले दार्चुला जिल्लाको दत्तु, जौलजीवी, तिगरमलगायत सीमा नाकामा समेत कडाइ गर्न थालेको छ । विद्यालय निर्माणका सामग्री ढुवानीमा समस्या भइरहेको हिमालय मावि हुतीका प्रधानाध्यापक दौलतसिंह खातीले बताए ।
महिलामाथि अभद्र व्यवहार
भारतीय सुरक्षाकर्मीले भारतबाट सामग्री किनेर ल्याउँदा महिलामाथि अभद्र व्यवहार गर्ने र अपशब्द बोल्ने गरेका छन् । जौलजीवी क्षेत्रमा रहेको अन्तर्राष्ट्रिय सीमानाकाबाट स्वदेश फर्किने बेला भारतीय प्रहरीले मालिकार्जुन गाउँपालिकाकी एक महिलामाथि अभद्र व्यवहार गरेका छन् ।
भारतबाट मलखाद ल्याउँदै गर्दा जौलजीवीका ती महिलालाई मल लैजान नपाइने भन्दै दुःख दिएको थियो । त्यति मात्र नभई मलखाद नेपाल ल्याउन दिएबापत भारतीय सुरक्षाकर्मीले नेपाली महिलामाथि यौन दुव्र्यवहार गर्ने गरेको जौलजीवीकी स्थानीय निर्मला चन्दले बताइन् ।
प्रतिक्रिया दिनुहोस !
