भैरहवाः भारत सरकारले प्रतिबन्ध लगाएको एक हजार र पाँच सय रुपैयाँ नोटको भैरहवामा कारोबार हुने गरेको खुलेको छ । कारोबारको लागि जम्मा पारिएको प्रतिबन्धित ५३ लाख भारतीय रुपैयाँको नोट सहित रुपन्देही प्रहरीले चार जनालाई भैरहवाको वाइट लोटस होटलबाट पक्राउ गरेको छ ।
पक्राउ पर्नेहरुमा रुपन्देही रोहिणी गाउँपालिका–५ का ५४ वर्षीय दुधनाथ योगी, सिद्धार्थनगर नगरपालिका २ का ३७ वर्षीय गणेश थापा, सोही नपा ८ का ३८ वर्षीय राजु बुढाथोकी र बुटवल उपमहानगरपालिका १६ का ४२ वर्षीय हेमराज कठरिया रहेका छन् ।
भारतीय नोटको अवैध कारोबार भइरहेको भन्ने विशेष सूचनाको आधारमा होटलबाट उनीहरुलाई प्रतिबन्धित भारतीय रुपैयाँको नोट सहित पक्राउ गरिएको जिल्ला प्रहरी कार्यालय रुपन्देहीका डिएसपी कुमोद ढुँगेलले बताए ।
उनीहरुको साथबाट भारु एक हजारका २ हजार ६ सय ५० थान र ५ सयका ५ हजार ३ सय थान प्रतिबिन्धत नोट बरामद भएको उनले जानकारी दिए ।
पक्राउ परेका सबै व्यक्ति एउटै समूहका हुन् र आफै प्रतिबन्धित नोट जम्मा गरेर विक्री गर्नका लागि होटलमा बसेका थिए स्रोतले अन्नपूर्ण पोस्ट्सँग भन्यो, ‘कति दररेटमा विक्री गर्न खोजेको थिए त्यो खुलेको छैन । यो प्रतिबन्धित नोटको कुनै दररेट हुँदैन ।’
प्रतिबन्धित एक हजार भारतीय रुपैयाँ एक सय भारतीय रुपैयाँमा सटही हुने गरेको बताइन्छ । भारत सरकारले सन् २०१६ नोभेम्बर ८ तारिख देखि एक हजार र ५ सय रुपैयाँको नोटमा प्रतिबन्ध लगाएपछि उक्त नोटहरु नेपालको विभिन्न स्थानमा अवैध तरिकाले सटही हुदै आएका छन् ।
नेपालमा पनि चलन चल्तीमा रहेका भारतीय नोटमा भारतमा सरकारले एक्कासी प्रतिबन्ध लगाएपनि नेपालमा रहेका नोटहरु नेपालमै रहेका छन् । हालसम्म उक्त नोटहरु भारत सरकारले सटही गरेको छैन । भारतमा प्रतिबन्धित नोट नेपालमा सटही हुने गरेको भारतीय सुरक्षा संयन्त्रलाई जानकारी भएको कारणपनि भारत सरकारले नेपालमा रहेको रकम सटही गर्न नचाहेको जानकारहरु बताउँछन् ।
नेपालको बैंकमा ९ सय ५० करोड बढी भारतीय प्रतिबन्धित नोटहरु जम्मा रहेको भारतीय तथ्यांक रहेको छ । भारतीय रिर्जव बैंकले प्रति व्यक्ति ४ हजार ५ सय रुपैयाँ सम्म प्रतिबन्धित नोटहरु नेपाली बैंकमा सटही गर्ने सक्ने बताएपनि हाल उक्त प्रक्रिया रोकिएको छ ।
प्रतिबन्धित भारतीय नोट सहिछ पक्राउ परेका व्यक्तिहरुलाई थप अनुसन्धान र कारवाहीको लागि राजश्व अनुसन्धान विभागमा पठाइएको प्रहरीले जनाएको छ ।
प्रतिक्रिया दिनुहोस !
