काठमाडौं : गायिका आनी छोइङ डोल्माले तुइन विस्थापनका लागि एक करोड सहयोग हस्तान्तरण गरेकी छिन् । नेपाल टेलिभिजनको “जनतासँग प्रधानमन्त्री” कार्यक्रममा गायिका शेर्पाले प्रधानमन्त्री केपी शर्मा ओलीले घोषणा गरेको तुइन विस्थापन कार्यक्रम सहयोगका लागि एक करोड रकम हस्तान्तरण गरेकी हुन् । उनले आफूले सहयोग गरेको रकमले एउटा मात्रै भएपनि झोलुङ्गे पुल बन्न सके पनि तुइन विस्थापनमा सघाउ पुग्ने उनले विश्वास व्यक्त गरिन् ।
गायिका शेर्पाले जनता र राष्ट्रको चाहनालाई सार्थकतापूर्वक अघि बढाउन सरकारलाई शुभकामना दिएकी छिन् । उनको “फूलको आँखामा फूलै संसार” गीत लोकप्रिय छ ।
सहयोग ग्रहण गर्दै प्रधानमन्त्री ओलीले आफूले एक महिनाको तलव थप गरी तुइन विस्थापन कोष स्थापना गर्ने घोषणा गरेका छन् । कार्यक्रम प्रस्तोता मनोज पाण्डेले कोषमा पचास हजार रुपैयाँ सहयोग दिने घोषणा गरे ।
प्रधानमन्त्री ओलीले अघिल्लो कार्यकालको पदबहालीको दिन मुलुकभरका सबै तुइन विस्थापनको घोषणा गरेका थिए ।
प्रतिक्रिया दिनुहोस !
