रावलपिण्डी : पाकिस्तानको अदालतले यहाँको सेना र गुप्तचर संस्था आईएसआईलाई अरू विभागको काममा हस्तक्षेप नगर्न आदेश दिएको छ । इस्लामाबाद उच्च अदालतले देशको छवि अन्तर्राष्ट्रिय स्तरमा बिग्रने भन्दै यस्तो आदेश दिएको हो ।
तीनपटक सैनिक कु भएर पहिले नै बदनाम भइसकेकाले सेना र आईएसआईलाइ सजग हुन भनिएको छ । न्यायाधीश शौकत अजीज सिद्दिकीले पाकिस्तानी सेना र गुप्तचरले सरकार र न्यायपालिकालाई प्रभावित गर्न षड्यन्त्र गर्ने गरेको पनि उल्लेख गरेका छन् । अजीजले भने, ‘सबैलाई थाहा छ, कसरी अदालतको सुनुवाइ प्रभावित गरिन्छ र आफूले चाहेको निर्णय आओस् भनेर शक्ति प्रयोग गरिन्छ ।’ अदालतले गृह र रक्षा मन्त्रालयका सचिवलाई यो निर्णय सेना प्रमुख र आईएसआईका निर्देशकसम्म पुर्याउन पनि आदेश दिएको छ । न्यायाधीश अजीजले गुप्तचर संस्थाले संविधानको दायरामा रहेर काम गर्नुपर्ने बताए । उक्त संस्था पाकिस्तानको भएकाले यहाँको कानुनअन्तर्गत रहेर रक्षा र सुरक्षा सेवासँग नजोडिएका न्यायपालिका, सञ्चारमाध्यम लगायतका अन्य संस्थासँग हस्तक्षेप बन्दा गर्नुपर्ने उनको भनाइ छ ।
अभद्र नबोल्न इमरानलाई चेतावनी
पाकिस्तानको निर्वाचन आयोगले पाकिस्तान तहरीक-ए-इन्साफ (पीटीआई)का प्रमुख इमरान खानलाई अनुचित शब्द नबोल्न चेतावनी दिएको छ । इमरानले राजनीतिक प्रतिद्वन्द्वीका लागि अभद्र भाषा प्रयोग गरेपछि आयोगले चेतावनी दिनुपरेको हो । उनले गत साता पाकिस्तानका पूर्वप्रधानमन्त्री एवं पाकिस्तान मुस्लिम लीग एनका नेता नवाज शरीफका समर्थक गधा भएको बताएका थिए । शरीफ र उनकी छोरी मरीयम आत्मसमर्पण गर्न पाकिस्तान फिर्ता हुँदा स्वागत गर्न जाने समर्थकहरू निश्चित रूपमा गधा नै हुने बताएका थिए । पीएमएल-एनका कार्यकर्ताले इमरानको उक्त टिप्पणीको कडा विरोध गरेका थिए । सिनेटमा यसको विरोध भएको थियो । डानको प्रतिवेदनअनुसार निर्वाचन आयोगले प्रचार प्रसारका क्रममा इमरान खानलाई राजनीतिक प्रतिद्वन्द्वीलाई अभद्र भाषा गर्न रोक लगाएको छ । आयोगले इमरानलाई आफ्नो कार्यालयमा उपस्थित हुन पनि आदेश दिएको थियो । आयोगसमक्ष उनी उपस्थित भने भएनन् । यद्यपि उनका वकील र पीटीआईका नेता बाबर अवान आयोग पुगेका थिए ।
सिन्ध प्रान्तमा निर्वाचन आयोगका आयुक्त अब्दुल गफ्फुर सूमरोको नेतृत्वको आयोगले पार्टीकै शीर्षस्थ नेताले निकृष्ट र अभद्र भाषा प्रयोग गर्दा विश्वभर पाकिस्तानको प्रतिष्ठा गतिलो नहुने स्पष्ट पार्यो । अवानले नेता इमरानले अभद्र शब्द प्रयोग नगरेको दाबी गरेका थिए । केही बहसपछि वकील अवानले पार्टी अध्यक्षका तर्फबाट लिखित वयान निर्वाचन आयोगलाई बुझाएका थिए । वयानमा आयोगको आदेश पालना गर्ने प्रतिबद्धता व्यक्त गरिएको छ ।
निर्वाचनमा प्रत्यक्ष भूमिका रहने छैन : सेना
पाकिस्तानको राष्ट्रिय सेनाले जुलाई २५ मा हुने संसदीय निर्वाचनमा आफ्नो कुनै ‘प्रत्यक्ष भूमिका’ नरहने जनाएको छ । पाकिस्तानी सेनाका प्रवक्ताले बिहीबार विज्ञप्तिमार्फत यस्तो बताएका हुन् । उनले आगामी निर्वाचनमा सेनाले निर्वाचनका लागि आवश्यक सुरक्षा दिने बाहेकको कुनै भूमिका नरहने बताएका हुन् । पाकिस्तानको आमनिर्वाचनको परिणामलाई प्रभाव पार्न सेनाले सञ्चारमाध्यम र सत्ताधारी दलमाथि दबाव सिर्जना गरेको भनी आएका आरोपप्रति लक्षित गरी आएका समाचारप्रति सेनाको यो भनाइ आएको हो । निर्वाचनका लागि ३ लाख ७० हजार सैनिक खट्ने र त्यसमा सेनाको कुनै स्वार्थ नरहने पाकिस्तानी सेनाका मेजर जनरल असिफ घाफुरले बताएका हुन् । उनले राजनीतिक प्रक्रियामा सेनाको संलग्नता अस्वीकार गर्दै भने, ‘सेना र यसको गुप्तचर निकाय नै राजनीतिक उद्देश्यका लागि काम गर्नेछैन । हाम्रो काम सरकारले आह्वान गरेको निर्वाचनलाई निष्पक्ष र निर्बाध रूपमा सञ्चालन गराउन सहयोग गर्नु हो ।’ निर्वाचन सफल बनाउन निर्वाचन आयोगले पनि सेनालाई जिम्मेवारी तोकेको छ ।
नवाजविरुद्ध जेलमा नाराबाजी
पाकिस्तानका पूर्वप्रधानमन्त्री नवाज शरीफविरुद्ध जेलमा कैदीले नाराबाजी गरेका छन् । नवाजलाई राखिएको अदियाला जेल प्रशासनले उनका गतिविधिमा पनि प्रतिबन्ध लगाएको छ । शरीफले अब मस्जिदमा नमाज पनि पढ्न पाउने छैनन् । जेल प्रशासनले शरीफ र उनकी छोरी मरीयमलाई जेलमा राख्न अप्ठेरो भएको भन्दै सिहाला रेस्ट हाउसमा स्थानान्तरण गरिने बताएको छ ।
‘डान न्युज’का अनुसार बुधवार राति सिहाला रेस्ट हाउसमा बम प्रतिरोधी टोली पठाइएको थियो । जाँचपछि नवाजलाई त्यहाँ सार्ने तयारी स्वरूप यस्तो गरेको दाबी छ । सुरक्षा अधिकारीले तीनपटक प्रधानमन्त्री भएका शरीफलाई जेलमा राख्नु असुरक्षित भएको पनि स्पष्ट पारेको छ । उक्त जेलमा आतंकवादी गतिविधिमा संलग्न व्यक्तिहरू कैदी रहेका छन् । वरिष्ठ प्रहरी अधिकारीका अनुसार अदियाला जेलबाहिर पनि सुरक्षा व्यवस्था कडा बनाइएको छ । सरसफाइपछि सिहाला रेस्ट हाउसलाई सजाइएको छ । यहाँ कैदीलाई डबल बेड, दुईवटा कुर्सी र एक टेबल दिइनेछ । यसअघि पूर्वराष्ट्रपति आसिफ अली जरदारीलाई पनि थुनामा राखिएको थियो ।
प्रतिक्रिया दिनुहोस !
