धनगढी : प्रदेश नम्बर ७ स्तरीय अन्नपूर्ण पोस्ट् कर्पोरेट ब्याडमिन्टन प्रतियोगिताको अन्तिम चरणको प्रतिस्पर्धामा छनोट भएका कैलालीका राजेन्द्र बम र शैलेन्द्रकुमार श्रेष्ठको जोडी धनगढीको शुभ श्री प्यालेसको ब्याडमिन्टन हलमा बिहान-बेलुकी कडा प्रशिक्षणमा जुटेका छन् । काठमाडौंमा हुने अन्तिम चरणको प्रतिस्पर्धामा पुरुष डबल्सको उपाधि जित्ने धोको दुवैको छ ।
‘यसपालि उपाधि उचाल्ने धोको छ, त्यसैअनुसार दुवै जनाले कडा रूपमा परि श्रम गरिरहेका छौं’, राजेन्द्र बमले भने । उनले गत वर्ष पनि पुरुष डबल्स खेलेका थिए । ‘गत वर्ष चुनावका कारण त्यति राम्रो तयारी गर्न सकिएन । पहिलो खेलमै पराजित भयौं’, राजेन्द्रले भने ।
गत वर्ष राजेन्द्र बमले सुरेन्द्र विष्टसँग जोडी बनाएका थिए । यसपालि भने उनले शैलेन्द्रकुमार श्रेष्ठसँग जोडी बनाए । ‘अन्नपूर्ण कर्पोरेट ब्याडमिन्टनमा मेरो पहिलो सहभागिता हो । दुवैले राम्रो तयारी गरेका छौं । प्रतियोगिता सुरु हुनु एकदुई दिन अगाडि नै काठमाडौं गएर प्रशिक्षण गर्ने गर्ने सोचमा छौं’, शैलेन्द्रले भने ।
दुवै खेलाडीले नवदुर्गा प्रिन्टर्सका तर्फबाट एक्जुक्युटिभ डबल्समा प्रतिस्पर्धा गर्ने सोच बनाएका छन् । ‘सकेसम्म पुरुष डबल्सको उपाधि जित्ने प्रयास रहन्छ, होइन भने एक्जुक्युटिभको उपाधि त प्रदेशमा लिएरै नै आउछौं’, श्रेष्ठले थपे । उनले पहिलोपटक सहभागी हुन लागेकाले अलि उत्साहित भएको बताए । उनले तराईमा खेलेका खेलाडीले काठमाडौंमा खेल्दा कर्कको स्पिड नमिल्ने भएकाले दुई दिन काठमाडौंमै प्रशिक्षण गर्ने बताए ।
यू-१९ पुरुष एकलको क्षेत्रीय च्याम्पियन देवराज रानाको पनि प्रतियोगिताको उपाधि उचाल्ने धोको छ । उनी गत वर्षको खुलातर्फ राष्ट्रिय रूपमै तेस्रो भएका थिए । ‘अन्नपूर्ण पोस्ट्ले यस वर्ष १९ वर्ष मुनिको प्रतियोगिता राखेकाले एकदमै खुसी छु, मलाई विश्वास छ, यसपालिको उपाधि मैले नै चुम्नेछु’, देवराजले भने ।
उनी यस वर्षको पुरुष एकल र यू-१९ पुरुक्ष एकलमा प्रथम भएका थिए । यही स्पर्धामा दोस्रो भएका अमृत चौधरी पनि प्रतियोगिताका लागि राम्रो तयारी गरिरहेको बताउँछन् । ‘हामीलाई गुरुहरूले पनि एकदमै मेहनत गरेर प्रशिक्षण गराइरहनु भएको छ । धनगढीको कभर्डहलमा एक महिनादेखि प्रशिक्षण गरिरहेका छौं’, रानाले भने । रानाले गत वर्ष पुरुष खुलातर्फ दोस्रो चरणको खेलमा एपीएफका खेलाडीसँग पराजय बेहोरेका थिए ।
यू-१९ महिला एकलकी विजेता कञ्चनपुरकी नीलिमा महराले पनि काठमाडौंमा हुने प्रतियोगिताका लागि आफूले राम्रै तयारी गरिरहेको बताइन् । यो स्पर्धामा विस्ना विष्ट दोस्रो भएकी थिइन्।
प्रदेश ७ बाट सहभागी हुने खेलाडी
पुरुष सिंगल
देवराज राना
जेबी साउद
महिला सिंगल
मोयुन तामाङ
विमला ओझा
यू-१९ पुरुष सिंगल
देवराज राना
अमृत चौधरी
यू-१९ महिला सिंगल
नीलिमा महरा
विस्ना विष्ट
पुरुष डबल्स
शैलेन्द्रकुमार श्रेष्ठ र राजेन्द्र बम
सुरेन्द्रकुमार बम र केशव भट्ट
प्रतिक्रिया दिनुहोस !
