पोखरा : प्रधानमन्त्री केपी शर्मा ओलीले ३ वर्षभित्रमा सबैभन्दा धेरै आर्थिक वृद्धिदर भएको देश बनाउन सकिने बताएका छन् । ‘यो युरोप होइन, जहाँ सीमान्त विकास भएको छ’, उनले भने, ‘यहाँ त विकासको सम्भावना मात्रै छ । सबै कुरा गर्न बाँकी छ ।’
१ नम्बर आर्थिक वृद्धिदर भएको देश बनाउनका लागि आफ्ना प्रयास केन्द्रित गर्दै मित्रराष्ट्रहरूसँग सहकार्य गर्ने प्रधानमन्त्रीले सुनाए । प्रधानमन्त्री ओली बिहीबार गण्डकी प्रदेशसभालाई सम्बोधन गर्दै थिए । उनले यस वर्ष ८ प्रतिशतको आर्थिक वृद्धिदर हासिल गर्ने पनि सुनाए ।
समृद्धिले मात्रै नहुने भन्दै ओलीले जनता सुखी पनि हुनुपर्ने बताए । ‘विकास गर्छाैं, समृद्धि गर्छाैं’, उनले भने, ‘समृद्धिले मात्रै सुख हुँदैन, सुख प्राप्त हुन अरू पनि कुरा छ । हामी सुसंस्कृत भएको हुनुपर्छ । सांस्कृतिक हिसाबले हाम्रो उत्थान भएको हुनुपर्छ । सुरक्षा सबैले पाएको हुनुपर्छ । त्यस कारण सामाजिक न्यायसहितको समृद्धि ।’
प्रधानमन्त्री ओलीले संयुक्त राष्ट्रसंघले सन् २०३० सालसम्म हासिल गर्ने भनेका दिगो विकासका लक्ष्य पनि त्यसअघि नै प्राप्त गर्ने सुनाए । ‘शिक्षासम्बन्धी, स्वास्थ्यसम्बन्धी अथवा सामाजिक सुरक्षाका प्रबन्धहरूमा एउटा मानवोचित अवस्थामा पु¥याउन सक्छौं’, उनले भने ।
संघीयताको नयाँ अभ्यासमा भएका कारण कहीँ दृष्टि नपुगेको हुन सक्ने भन्दै प्रधानमन्त्री ओलीले आगामी दिनमा अनुभवका आधारमा अघि बढ्ने बताए । ‘प्रदेशसभा पहिला थिएन, बरु स्थानीय तहको ठाउँमा स्थानीय निकाय थियो, केन्द्र सरकार थियो’, उनले भने, ‘संविधानको अनुसूचीअनुसारका अधिकार र स्रोतको बाँडफाँट र तालमेल मिलाउन केही समय लाग्ला ।’
गण्डकी प्रदेशमा फिल्म सिटी निर्माण गर्ने योजना प्रधानमन्त्री ओलीले सुनाए । उनले फिल्मसिटी अध्ययनका लागि भारतीय जीटीभीका अध्यक्षसहितको टोली केही दिनमै आउन लागेको जानकारी दिए । तनहुँ र गोरखाको बीचमा मस्र्याङ्दी उपत्यकातिर फिल्मसिटी निर्माण गर्न सकिने उनको भनाइ थियो । ‘त्यसपछि त आधा मुम्बई गण्डकी प्रदेशमै हुन्छ’, उनले भने, ‘अभिताभ बच्चन त्यसै नेपाल आएका होइनन् ।’
पहिलो प्रधानमन्त्रीत्वकालमा भनेअनुसार २ वर्षभित्र तुइँनमुक्त नेपाल बनाउने अभियान छिट्टै पूरा हुने पनि ओलीले सुनाए । ‘म तुइनको सत्रु हुँ’, उनले भने, ‘अझै केही केही ठाउँमा तुइँन बाँकी नै छन्, तर उहिले उहिले नेपालमा तुइँन थिए रे भन्ने समय आउँदै छ ।’ समुद्रसम्म जोडिने गरी नदीहरूको बाटोमा पानीजहाज चल्ने दिन छिट्टै आउने पनि प्रधानमन्त्रीको भनाइ थियो । उनले भने, ‘त्यसमा काम भइरहेको छ, रक्सौल–काठमाडौं रेलको सर्भे भइरहेको छ, पूर्वपश्चिम रेल बनाउन झन् सजिलो छ त्यो पनि हुन्छ ।’ चीन र भारतबाट आउने रेलमा नेपालबाट खानेपानी निर्यात गर्न सकिने सम्भावना प्रधानमन्त्री ओलीले औंल्याए । ‘हाम्रा लेकलेकमा मिनरल वाटर छ’, उनले भने ।
प्रधानमन्त्रीले मध्याह्न पौने १ बजे प्रदेशसभालाई सम्बोधन गर्ने कार्यक्रम सार्वजनिक भएको थियो । तर उनी निर्धारित समयभन्दा २ घण्टा ढिला आइपुगेका थिए । त्यसअघि पोखरा विश्वविद्यालयको सिनेट बैठकमा सहभागी उनले पोखरा अन्तर्राष्ट्रिय विमानस्थल निर्माण गतिविधिबारे पनि अवलोकन गरी चासो लिएका थिए । प्रधानमन्त्री ओली आउने पूर्वनिर्धारित समयअनुसार प्रदेशसभा अगाडि पुगेर कालोझण्डा देखाउने तयारी गरेका २५ युवालाई कास्की प्रहरीले समातेको थियो । उनीहरू कांग्रेस र नयाँ शक्ति पार्टीआबद्ध विद्यार्थी थिए । प्रधानमन्त्री ओली बिहीबारै काठमाडौं फर्किए ।
प्रतिक्रिया दिनुहोस !
