चितवनः रत्ननगर नगरपालिकाले गाईलाई पनि सुत्केरी भता दिन सुरु गरेको छ । नगरपालिकाका पशुपक्षी शाखाका प्रमुख शालिग्राम पौडेलका अनुसार साउन १ गतेदेखि लागू हुनेगरी गाईलाई पाँच सय रुपैयाँ सुत्केरी भत्ता दिन शुरु गरेको हो ।
‘अब साउन १ गतेयता ब्याएका गाईलाई नगरपालिकाले भत्ता दिने निर्णय भएको छ । कार्यविधि बनेपछि रकम वितरण पनि शुरु हुन्छ तर त्यसका लागि प्रमाण भने पु¥याउनुपर्ने हुन्छ ’ उनले भने ।
गाई ब्याउने वित्तिकै किसानले खबर गरेमा पशु प्राविधिक किसानकै घरमा पुगेर अभिलेख राख्ने र उपयुक्त समय मिलाएर भत्ता वितरण वितरण गरिने नगरपालिकाले जानकारी दिएको छ ।
किसानलाई गाईपालनमा प्रोत्साहनका लागि यस्तो कार्यक्रम ल्याइएको हो । प्रतिगाई एक हजारका दरले भत्ता दिने तयारी गरिए पनि नगरपालिकाले बजेट कटौती गरेकाले रु ५०० मात्रै दिन लागेको हो ।
रत्ननगर नगरपालिका क्षेत्रमा करीब ३५ हजार गाई छन् भने व्यावसायिक रुपमा १०० गाई फार्म छन् तर स्थानीय जातका गाईले समेत भत्ता पाउने पशु स्वास्थ्य प्राविधिक ईश्वर मिश्रले बताए ।
रत्ननगरमा कृत्रिम गर्भाधान गर्ने गाईको संख्या ६ हजार २०० छ । त्यसमा ७० प्रतिशत गाई सुत्केरी हुन्छ, भन्ने अनुमानले करीब चार हजार गाईलाई भत्ता दिने योजना बनाइएको उनले बताए ।
यसका लागि ४० लाख रुपैयाँ बजेट माग गरिए पनि नगरपालिकाले २० लाख रुपैयाँ बजेट छुट्याएको प्राविधिक मिश्रले जानकारी दिए । थोरै गाईपालन गर्ने किसानले समेत भत्ता स्वरुपको रकम पाउनु खुसीको कुरा भएको रत्ननगरका किसान काशिराम भुषालले बताए ।
सहकारीका अध्यक्ष विष्णुप्रसाद लामिछानेले सुत्केरी भत्ता दिने कार्यक्रम सकारात्मक भएपनि रोग नियन्त्रणका विषयमा भने सरकारबाट सहयोग नपाएको गुनासो गरेका छन् । रासस)
प्रतिक्रिया दिनुहोस !
