नेपालगन्ज : अन्नपूर्ण पोस्ट्ले गत वर्ष आयोजना गरेको कर्पोरेट ब्याडमिन्टन प्रतियोगितामा दोस्रो चरणबाट बाहिरिएका शिव थापा यो पटक भने उपाधि उचाल्ने दाउमा छन् । ‘मैले धेरै प्रयास गरेको छु । मेरो मेहनत खेर जान दिन्न’, उनले भने ।
यहाँका अर्का आशा लाग्दा खेलाडी हुन्, सहरोज अन्सारी । उनी अन्तर्राष्ट्रिय स्तरका प्रतियोगिता भएकाले निकै हौसिएका छन् । ‘निकै कडा प्रतिस्पर्धा हुन्छ तर मैले हार मानेको छैन । गुरुहरुलाई निराश बनाउँदिन’ उनले भने ।
अन्नपूर्ण पोस्ट् इन्टरनेसनल कर्पोरेट ब्याडमिन्टन प्रतियोगितामा प्रदेश ५ ले यू–१९ बाट उपाधि जित्ने आशा गरेको छ । यू–१९ मा नेपालगन्जबाट पाँच जना खेलाडी छनोट भएका छन् । जसमध्ये समीक्षा न्यौपाने, सफल थापा, सहरोज अन्सारी, शिव थापा र सुष्मा थापा छन् ।
प्रशिक्षण लिन समीक्षा र सफल एक हप्ताअघिदेखि राजधानी गइसकेका छन् । सहरोज, शिव र सुष्माले भने नेपालगन्जमै प्रशिक्षण लिएका छन् ।
टिम म्यानेजर तथा प्रशिक्षक सुदिल लाखे सबै खेलाडीले राष्ट्रिय प्रतियोगिता खेलिसकेकाले उपाधि ल्याउनेमा निकै आशावादी छन् । ‘दुई जना काठमाडौंमा प्रशिक्षणमा छन् भने तीन जना नेपालगन्जमै ब्यापक तयारीमा जुटेका छन् । यसैले उनीहरुबाट पदकको आशा गर्न सकिन्छ’ उनले भने ।
नेपालगन्ज ब्याडमिन्टन क्लबका अध्यक्ष संजय थापा पनि जुनियर प्रतिस्पर्धामा यहाँका खेलाडीले राम्रो प्रदर्शन गर्ने बताउँछन् । ‘हामीलाई आशा छ । उनीहरुले निराश बनाउँदैनन्’ उनी भन्छन्।
सिनियर खुलातर्फ नेपालगन्जबाट चार जना खेलाडीले प्रतिस्पर्धा गर्दैछन् । विगतमा राष्ट्रिय र अन्तर्राष्ट्रिय प्रतियोगिता खेलिसकेका इरफान अन्सारी, सम्झना शर्मा, रियाज अन्सारी र संगम पुन मगर पनि उपाधि उचाल्ने कसरतमा जुटेका छन् ।
प्रतिक्रिया दिनुहोस !
