इस्लामावाद : पाकिस्तानमा आसन्न निर्वाचनका उम्मेदवारको आइतबार हत्या भएको छ ।मतदानको दिन नजिकिँदै गर्दा पाकिस्तानमा भएका हिंसाका घटना बढ्दै गएका छन् । आइतबार भएको घटनामा एक उम्मेदवारसहित दुईजनाको मृत्यु भएको र अरू केही घाइते भएको प्रहरी अधिकारीले बताएका छन् । स्थानीय एक प्रहरी अधिकारी मन्जुर अफ्रिदीले दिएको जानकारीअनुसार गान्दापुरका लागि पाकिस्तान तेहरिक ए इन्साफ (पीटीआई)का उम्मेदवार इक्रामुल्लाह खान र उनका चालकको मृत्यु भएको हो।
आत्मघाती हमलाबाट घाइते भएका दुवैजनालाई अस्पतालमा पुर्याएर उपचार गराइरहेको भए पनि उपचार सफल नभएपछि निधन भएको घोषणा गरिएको थियो । आक्रमणकारीले गान्दापुरमा चुनावी कार्यक्रममा सहभागी भएका व्यक्तिहरूलाई लक्षित गरी आत्मघाती बम हमला गरेको अफ्रिदीले जानकारी दिए । प्रहरीले घटना भएको क्षेत्रमा १३ जना प्रहरीलाई खटाएको भए पनि उनीहरूले प्रहरीलाई खबर नगरी आफ्नै सुरले हिँडेकाले घटना भएको प्रहरी अधिकारीको भनाइ छ ।
प्रहरीले यस्ता अप्रिय घटना हुनसक्ने चेतावनी पहिले नै दिएको भए पनि उनीहरूले बेवास्ता गरेको बताइएको छ । आइतबार भएको घटनाका बारेमा अहिलेसम्म कुनै समूहले जिम्मेवारी लिएको छैन । पाकिस्तानमा बुधवार निर्वाचन हुँदै छ । त्यहीअनुसार निर्वाचन प्रचारप्रसार कार्यक्रम तीव्र भइरहेको छ । प्रचारप्रसारको तीव्रतासँगै पाकिस्तानमा यस पटकको निर्वाचनका लागि आयोजित कार्यक्रममा भएका आक्रमणमा कम्तीमा १७० जनाको मृत्यु भएको छ भने २ सयभन्दा बढी घाइते भएका छन् ।
लागुऔषध कारोबारी नेतालाई आजन्म कारावास
पाकिस्तानका एक नेतालाई लागुऔषधको कारोबारमा संलग्न रहेको आरोपमा अदालतले आजन्म काराबासको सजाय सुनाएको छ । उनी पाकिस्तानको सत्तारुढ दल पाकिस्तान नेसनल मुस्लिम लिग (पीएनएम–एन)का नेता तथा वर्तमान सांसद हुन् । पीएनएम–एन पूर्वप्रधानमन्त्री नवाज शरीफको दल हो ।
सांसद हनिफ अब्बासीमाथि लागुऔषध प्रयोग गरेको अभियोगमा मुद्दा थियो । उक्त मुद्दामा भएको अन्तिम सुनुवाइमा शनिबार यस्तो आदेश भएको हो । उनी आगामी बुधबार पाकिस्तानमा हुन लागेको आमनिर्वाचनमा पनि सांसदको उम्मेदवार रहेका थिए । मुद्दाको अन्तिम किनारा नलागिसकेकाले निर्वाचन आयोगले उनको उम्मेदवारी स्वीकार गरेको थियो । उनको आफ्नो औषधि कम्पनीले यस्तो लागुऔषध उत्पादन गरेर बजारमा बेच्ने गरेको लागुऔषध नियन्त्रण विभागले पत्ता लगाएको थियो ।
लामो समयको अनुसन्धानपछि उनी दोषी रहेको पत्ता लागेको हो । पाकिस्तानमा जारी कानुनमा लागुऔषधको कारोबार गर्नेलाई मृत्युदण्डसम्मको सजाय दिने गरिन्छ । उनलाई भने आजन्म कारावासको सजाय दिइएको छ । उनीमाथि सन् २०१२ मा मुद्दा लगाइएको थियो ।
उनी पाकिस्तानी पूर्वप्रधानमन्त्री नवाज शरीफका निकट सहयोगी हुन् । निर्वाचनको तीन दिनअघि उनलाई अनायासै यो कारावासको सजाय तोकिएको छ । यो फैसलाले पनि नवाज शरीफको दललाई राजनीतिक रूपमा ठूलो घाटा पुगेको अधिकारीले जनाएका छन् । उनलाई यो फैसला सुनाइएपछि अदालतभित्र उपस्थित उनका समर्थकहरूले अदालतले राजनीतिक रूपमा प्रेरित भएर यो फैसला गरेको आरोप लगाउँदै अदालतविरुद्ध नाराबाजी गरेका थिए ।
प्रतिक्रिया दिनुहोस !
