जनकपुरधाम : नेपाल भारतसीमा क्षेत्र दसगजामा एकलौटी रुपमा भन्सार चेकपोष्ट निर्माण कार्य सुरु गरेको भारतले निर्माण कार्य स्थगित गरेको छ । नेपालको दबाबपछि भारतले दुई दिनका लागि निर्माण कार्य स्थगित गरेको हो ।
नेपाली सञ्चारमाध्यममा निरन्तर आएको समाचार र सशस्त्र प्रहरीको अवरोधपछि भारतीय अधिकारीहरुले दुई दिनभित्र प्राविधिक टोली मगाउने सर्तमा निर्माण कार्य रोकेको बोर्डर आउटपोष्ट नगराइनका सशस्त्र प्रहरी निरीक्षक जगदीशप्रसाद चौधरीले जानकारी दिए ।
जेठ १५ गतेदेखि धनुषा जिल्लाको नगराइन नगरपालिका–२ जटही नाकास्थित दसगजामा पर्ने रिफरेन्स पिलर ५१ र मुख्य पिलर २८४÷३५ को बीचमा भारतले भन्सार चेक पोष्ट निर्माण कार्य नै थालेको थियो ।
दसगजामा कसैले पनि यस प्रकारका घरटहरा वा सार्वजनिक प्रयोजनको भौतिक संरचना निर्माण गर्न नपाउने प्रावधान हुँदाहुँदै पनि भारतले चेकपोष्ट निर्माण गरिरहेको हो । सशस्त्र प्रहरीको तर्फबाट निकै अवरोध गरिए पनि नेपालका प्रहरीको अनुरोधलाई वेवास्ता गर्दै भारतीय पक्षले एसएसबीका जवानहरुलाई तैनाथ गरी धमाधम निर्माणको कार्य अघि बढाएको थियो ।
आइतबारसम्म पिलर गाड्नका लागि जग खन्ने कामसमेत सकेर भारतबाट इँटासमेत खसाइएको थियो । तर पुनः सशस्त्र प्रहरीले अवरोध गरेपछि भारतीय अधिकारीहरुले नेपालका नापी विभागका कर्मचारीलाई बोलाएर सीमा क्षेत्रको नापी दुई दिनभित्र गराउने शर्तमा निर्माण कार्य रोकेको सशस्त्र प्रहरी धनुषाका उपरीक्षक राजु पाण्डेको भनाई छ ।
नापी विभागमा यस विषयमा पत्राचार भइसकेको र धनुषाका प्रमुख जिल्ला अधिकारीसँग विभागले समन्वय गरिरहेको उपरीक्षक पाण्डेले बताए । प्रमुख जिल्ला अधिकारी गोपाल पराजुलीले दसगजाको निर्माण कार्य हाल कुटनीतिक प्रयासबाटै रोकिएको र यो एक वा दुई दिनका लागि नभई सीमाको यकिन सर्वेक्षण नभएसम्मका लागि भएको जानकारी दिए ।
पराजुलीले भने, ‘नेपाल भारत सीमा समस्या समाधान गर्न बनेका विभिन्न समितिहरुले पनि यस विषयमा समन्वय गरिरहेका छन् र हामी शिघ्र नै यस विवादलाई समाधान गर्नेछौं ।’
प्रतिक्रिया दिनुहोस !
