भक्तपुर : भक्तपुरका एलिना भुजू र सन्दीप थापा मिस एन्ड मिस्टर फेसन रनअवे मोडल बनेका छन्। भक्तपुरको सूर्यविनायकस्थित राफेल इन्स्टिच्युट अफ फेसन एन्ड आर्टस् (रिफा)द्वारा आयोजित फेसन रनअवे मोडल्स २०१८ को उपाधि एलिना र सन्दीपले जितेका हुन्।
विजेताद्वयले एभरेस्ट फिल्म एकेडेमीबाट एक लाख रुपैयाँ बराबरको छात्रवृत्ति, पोखरास्थित होटल पिनाकिनीमा तीन दिन र दुई रातको बसाइसँगै अन्य धेरै गिफ्ट ह्याम्पर जितेका छन्।
सयजना युवकयुवतीबीच भएको उक्त स्पर्धामा एलिना उत्कृष्ट १९ र १२ हुँदै उपाधि जित्न सफल भएकी हुन् भने सन्दीपले उत्कृष्ट आठ र पाँच हुँदै उपाधि हात पारेका हुन्। विजेता एलिना व्यक्तिगत विधातर्फ बेस्ट वल्कसमेत घोषित भएकी थिइन्। त्यस्तै सन्दीपले बेस्ट फोटोजेनिकको उपाधिसमेत हात पारे।
उक्त स्पर्धामा युवतीतर्फ पूर्णिमा महर्जन फस्ट रनरअप र प्रियंका मानन्धर सेकेन्ड रनरअप घोषित भए। त्यस्तै युवातर्फ बिजेश जोशी फस्ट रनरअप र सञ्जीव चौधरी सेकेन्ड रनरअप बन्न सफल भए।
व्यक्तिगत विधामा मोस्ट पब्लिक च्वाइसमा युवतीतर्फ सचिना श्रेष्ठ र युवातर्फ हुकुमराज मगर घोषित भए। हुकुमराजले बेस्ट वल्कको अर्को व्यक्तिगत उपाधिसमेत जिते। मोस्ट इन्टेलिजेन्टको उपाधि युवतीतर्फ निशा बराइली र युवातर्फ मन्दीप राईले जिते। नबस्रिना वासु बेस्ट फोटोजेनिक घोषित भइन्।
करिब चालीस दिनको क्लोज क्याम्पपछि ग्रान्ड फिनालेका लागि युवतीतर्फ १९ र युवातर्फ आठ मोडल छनोट भएको रिफाका निर्देशक एलेक्स वासुकलाले जानकारी दिए।
उनका अनुसार ग्रान्ड फिनालेका चार चरणमध्ये तीन चरणबाट युवतीतर्फ उत्कृष्ट १२ र युवातर्फ उत्कृष्ट पाँच मोडल छानिएको थियो। यसरी छानिएका मोडललाई अन्तिम चरणमा प्रश्नोत्तर चरणबाट विजेता, फस्ट र सेकेन्ड रनरअप घोषित गरिएको थियो।
रोजन श्रेष्ठको कोरियोग्राफी रहेको फेसन रनअवे मोडल्सका निर्णायकमा फेसन डिजाइनर रसना श्रेष्ठ, कोरियोग्राफर एवं मोडल शनिस शाक्य र मोडल फोटोग्राफरद्वय अभिषेकराज मास्के र सिलु जैन रहेका थिए।
प्रतियोगी मोडलहरूको लुगाको डिजाइन भने रिफाका निर्देशक वासुकला र रिफाका विद्यार्थीले गरेका थिए। त्यस्तै मोडलहरूको शृंगार रायन राय, पूजा श्रेष्ठ, नवीना गुरुङ, उर्मिला ज्याख्व, रेश्मा दुवाल, जापना राय र ज्योति खड्काले गरेका थिए।
प्रतिक्रिया दिनुहोस !
