काठमाडौं : एपीएफ क्लबका दीपेश धामी र जेष्ट ब्याडमिन्टन क्लबका सुनिल जोशी अन्नपूर्ण पोस्ट् इन्टरनेसनल कर्पोरेट ब्याडमिन्टन प्रतियोगिताको पुरुष एकल स्पर्धाको तेस्रो चरणमा प्रवेश गरेका छन् । राष्ट्रिय खेलदकुद परिषद्को कभर्डहलमा मंगलबार भएको खेलमा दीपेशले प्रदेश ५ का निरञ्जन चौधरीलाई २१-१०, २१-७ को सोझो सेटमा हराए । अर्को खेलमा सुनिलले पनि प्रदेश ५ कै शिव थापालाई २१-७, २१-६ को सेटमा स्तब्ध बनाए ।
सोही स्पर्धाको अर्को खेलमा नेपाल पुलिस क्लबका जीवन आचार्यले भारतका उदयबहादुर भट्टाचार्यलाई २१-६, २१-९ को सेटमा हराए । बैकुण्ठ श्रेष्ठले भने प्रदेश ४ का भूगोल गुरुङसँग वाकओभर पाए । पुलिसका दीपक बोहोराले प्रदेश ६ का जितप्रसाद लामिछानेलाई २१-११, २१-८ अंकले पाखा लगाए । अर्को खेलमा भारतका शुभ डेले प्रदेश १ का प्रनिशसिंह ठकुरीलाई २१-१६, २१-१९ अंकले पराजित गरे ।
सोही स्पर्धाको अन्य खेलमा एपीएफ क्लबका विजित थापामगरले बाँकेका सरोज अन्सारीलाई २१-१४, २१-१७, बंगलादेशका महमद सलमान खानले भारतका राजदीप शर्मालाई २१-१५, २१-११ र एपीएफका निरञ्जन देवकोटाले प्रदेश १ का सुजन श्रेष्ठलाई १३-२१, २१-१८, २३-२१ को सेटमा हराउँदै तेस्रो चरणमा स्थान पक्का गरे ।
त्रिभुवन आर्मी क्लबका प्रफुल्ल महर्जनले भने प्रदेश ७ का जेबी साउदसँग वाकओभर पाए ।
अन्य खेलमा आर्मीका रुकेश महर्जनले एमआईबीसीका नीरविक्रम देवकोटालाई २१-१८, २१-११, भारतका सेख महमद रहिमले एपीएफका सुदीप सेढाईलाई २१-१६, २१-१८, नेपालका प्रिन्स दाहालले एपेक इन्टरनेसनलका अकिल श्रेष्ठलाई २१-९, २१-१५ र आर्मीका प्रविन लिङ्थेपले प्रदेश ७ का देवराज रानालाई २१-१९, २१-१८ ले पराजित गरे । पुलिस क्लबका विष्णु कटुवालले भने प्रदेश २ का रामकुमार श्रेष्ठसँग वाकओभर पाउँदै तेस्रो चरणमा स्थान पक्का गरे ।
प्रतिक्रिया दिनुहोस !
